Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 328 Hüküm no: 483 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fes boyacısı Andon’un Sarraf Bedros’a olan borcunu ödemesi 235 guruş hüküm [Ma‘rûz] Sarrâf tâifesinden Bedros v. Ohannes nâm zimmî İstanbul Bâb Mahkemesi’nde meclis-i şer‘-i hatîrde fes boyacı esnâfından Andon v. Yani nâm zimmî muvâcehesinde işbu yedimde olup bin iki yüz elli dört senesi şehr-i Rebî‘ülevveli’nin on birinci günü târîhiyle müverrah Rûmiyyü’l-imlâ bir kıt‘a temessük mantûkunca mâlımdan ve yedimden iktirâz ve kabz ve umûruna sarfla istihlâk eylediği üç yüz guruş alacak hakkımın ancak altmış beş guruşunu mukaddemâ mersûmun yedinden kabz etmemle bâkīsi olan iki yüz otuz beş guruşu mersûm Andon zimmîden hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin deynim [olan] meblağ-ı bâkī-i mezkûr iki yüz otuz beş guruşu işbu târîhden dört gün mukaddem müdde‘î-i mersûma tamâmen edâ ve teslîm etmişidim deyü müdde‘î-i mersûmun inkârına mukārin eylediği def‘ine ikāmet-i beyyine edemeyip bi’t-taleb mersûm Bedros zimmîye bi’l-muvâcehe vech-i şer‘î üzere yemîn verilmeğin mûcebince dâfi‘-i mersûm Andon zimmî <> def‘-i mezkûruyla mersûm Bedros zimmîye bilâ-beyyine mu‘ârazadan ba‘de’l-men‘ mersûm Andon zimmînin sâlifü’l-beyân ikrârıyla lâzım gelen meblağ-ı bâkī-i mezkûr 235 guruşun müdde‘î-i mesfûr Bedros zimmîye edâ ve teslîmiyle mersûm Andon zimmîye [zimmî] ilzâm olunduğu huzûr-ı [âlîlerine i‘lâm olundu] Fî 11 S sene [12]56