Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 328 Hüküm no: 484 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasyalı Ebubekir Ağa’nın hamamda kaybolan eşya ve paralarından sorumlu tuttuğu hamam natırları Tokatlı Mehmed ve diğer Mehmed’e açtığı davayı ispat edemediği Men‘ [Ma‘rûz] Etbâ‘dan Amasyevî Ebubekir Ağa b. Mustafa nâm kimesne İstanbul Bâb Mahkemesi’nde meclis-i şer‘-i münîrde İstanbul’da Küçükpazar kurbünde Acıhamam nâtırı Tokadlı es-Seyyid Mehmed b. Ahmed ve es-Seyyid el-Hâc Mehmed b. Mustafa nâm kimesneler muvâcehelerinde ben târîh-i i‘lâmdan bir gün mukaddem tathîr âb-dân için hamam-ı mezkûra vardığımda mezbûr es-Seyyid Mehmed bana yer gösterip ben dahi soyunup esvâbımı mezbûr es-Seyyid Mehmed’de gözet mukayyed ol deyü teslîm edip hamama girip çıkdığımda mezbûr es-Seyyid Mehmed yerine merkūm es-Seyyid el-Hâc Mehmed’i bırakıp ben dahi esvâbımı giyinip yeleğimin cebine bakdığımda bir guruş kıymetli bir siyah kesem ile derûnunda yirmi sekiz guruşluk mahlût beyaz para ve doksan beş guruşa mu‘âdil on dokuz aded beşlik altınım nâ-mevcûd olduğundan nakd-i merkūm ile mârrü’l-beyân keseyi merkūmân es-Seyyid Mehmed ve es-Seyyid el-Hâc Mehmed bi’l-ma‘iyye emriyle nakd-i merkūm ile sâlifü’<>z-zikr kese mevcûd ise aynını müstehleke ise ba‘de’s-sübût misilleriyle kıymetini merkūmândan taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsına ikāmet-i beyyine edemeyip bi’t-taleb mezbûrân es-Seyyid Mehmed ve es-Seyyid el-Hâc Mehmed’e bi’l-muvâcehe vech-i şer‘î üzere [yemîn] teklîf olunmalarıyla mûcebince müdde‘î-i merkūm Ebubekir Ağa da‘vâ-yı mezkûresiyle mezbûrân es-Seyyid Mehmed ve es-Seyyid el-Hâc Mehmed’e bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu] Fî 6 S sene [12]56