Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 329 Hüküm no: 485 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un değerli iğnesinin tazmin edilmesi talebiyle Şeyh Abdulkadir Efendi’ye açtığı davada sulh olduğu 1100 [guru]şa sulh Ma‘rûz Sâhibe-i arzuhâl mu‘arrefetü’z-zât Âişe nâm-ı diğer Anberzar Kadın bt. Abdullah İstanbul Bâb Mahkemesi’nde meclis-i şer‘-i münîrde derûn-ı arzuhâlde mezkûrü’l-ism eş-Şeyh Abdülkadir Efendi b. Abdülgani nâm kimesne muvâcehesinde işbu târîh-i i‘lâmdan dokuz sene mukaddem yedimde mâlım olan iki bin guruş kıymetli altın üzerine masnû‘ pat resmi bir elmas iğnemi âhardan istidâne ve iktirâz <> etmek <> için merkūm Abdülkadir Efendi’ye teslîm eylediğimde ol dahi ba‘de’l-kabz sâlifü’z-zikr iğneyi iki bin guruş semen-i makbûza fuzûlî âhara bey‘le istihlâk etmekle kıymet-i mezkûresi olan 2000 guruşu merkūm eş-Şeyh Abdülkadir Efendi’den damânen taleb ederim deyü tasaddî eylediğim da‘vâmdan bâ-tavassut-ı muslihîn merkūm Abdülkadir Efendi ile bi’t-tav‘ ve’r-rızâ bin yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr bin yüz guruşu müdde‘iyye-i mezbûre Âişe Kadın’a edâya merkūm es-Seyyid eş-Şeyh Abdülkadir Efendi’ye tenbîh olunduğu huzûr-ı [âlîlerine i‘lâm olundu] Fî 8 S sene [12]56