Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 330 Hüküm no: 486 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamidiye Ekmekçibaşısı Yunus Ağa’nın satın aldığı cariyenin hamile olduğundan parasının geri verilmesi talebiyle İsmail Ağa’ya açtığı davayı ispat edemediği Men‘ Ma‘rûz Sâhib-i arzuhâl Hamidiye İmâreti Ekmekçibaşısı Yunus Ağa b. el-Hâc Ömer tarafından husûs-ı âti’<>l-beyânda vekîl-i müseccel-i şer‘îsi İbrahim Edhem Ağa b. Mehmed nâm kimesne İstanbul Bâb Mahkemesi’nde meclis-i şer‘-i münîrde derûn-ı arzuhâlde mezkûrü’l-ism Enderûn-ı hümâyûn’dan muhrec İsmail Ağa b. Hüseyin nâm kimesne muvâcehesinde sene-i sâbıkā Şa‘bânü’l-mu‘azzamının yirminci günü işbu hâzır bi’l-meclis Esirci Mustafa b. Osman vesâtetiyle cemî‘ uyûbdan sâlime olmak üzere müvekkilim mezbûrun iki bin üç yüz guruş semen-i medfû‘ ve makbûza iştirâ ve kabz eylediği işbu hâzıratü bi’l-meclis bir re’s zenciye câriyenin haml-i zâhiri olup câriye-i mezbûre mu‘ayyebe olmağla ayb-ı mezkûr şirâ târîhinden mukaddem câriye-i merkūmede mevcûd ve kadîm ve inde’t-tüccâr noksân-ı semen îcâb eder uyûbdan olmağın redd-i mebî‘ [ve] istirdâd-ı semen olunmak bi’l-vekâle matlûbumdur deyü teveccüh-i husûmet bulundukdan sonra bi’l-vekâle da‘vâ ettikde ol dahi cevâbında câriye-i mezbûreyi târîh-i merkūmda ber-minvâl-i muharrer cemî‘ uyûbdan sâlime olduğu hâlde ol mikdâr guruş semen-i makbûza müvekkil-i merkūma bey‘ini ikrâr lâkin ayb-ı mezkûrun kıdemini inkâr etmekle haml-i merkūme mimmâ lâ-yettali‘u’r-ricâl olup husûs-ı mezkûrda şehâdetleriyle redde kādir olmayıp ancak tahlîf olunmak lâzım geldiği vekîl-i merkūma tefhîm olundukda istihlâf etmeğin merkūm İsmail Ağa’ya bi’l-muvâcehe vech-i vecîh-i şer‘î üzere yemîn verilmeğin mûcebince müdde‘î-i vekîl-i merkūm İbrahim Edhem bi’l-vekâle da‘vâ-yı mezkûresiyle mezbûr İsmail Ağa’ya bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 6 S sene 1256