Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 331 Hüküm no: 487 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav Anaştaş ile amcası İstavri’nin birbirlerinde olan alacak-verecek davasında sulh oldukları 1586 guruşdan ibrâ Ma‘rûz Manav tâifesinden sâhib-i arzuhâl Anaştaş v. Dimitri v. Praşkova nâm zimmî İstanbul Bâb Mahkemesi’nde meclis-i şer‘-i hatîrde tâife-i merkūmeden derûn-ı arzuhâlde mastûrü’l-ism li-ebeveyn ammi İstavri v. el-mersûm Praşkova muvâcehesinde bin iki yüz kırk altı senesi Muharremi’l-harâmı gurresinden elli senesi Zilhiccetü’ş-şerîfesi gāyetine gelince mersûmun talebiyle Eminönü’nde vâki‘ manav dükkânında bilâ-tesmiyetü’l-ücret beş sene hizmet ve ba‘dehu müfârakat etmemle müddet-i mezkûrede ecr-i mislim olan üç bin guruş ve ba‘dehu elli bir senesi gāib ani’l-beled Manav İsmail ile bir sene müddet şerîkler olup sene-i mezkûre Zilhiccetü’ş-şerîfesi gāyetinde fesh-i akd-i şirket birle hesâbımızı rü’yet eylediğimizde fâide-i hâsıladan benim hisseme isâbet edip emir ve tevkîlimle mersûm İstori zimmînin benimçün kabz ve bana vermeyip bi-gayri hakkın umûruna sarfla istihlâk eylediği bin sekiz yüz guruş ki cem‘an dört bin sekiz yüz guruşu mersûm İstori zimmîden taleb ederim deyü da‘vâ eylediğimde ol dahi cevâbında benim senin zimmetinde bundan akdem mâlımdan ve yedimden bi’d-defa‘ât iktirâz ve kabz eylediğin yedi yüz doksan altı guruş ve bi-şartı’r-rücû‘ emrinle gāib ani’l-meclis Dolaşıkoğlu Mosail zimmîye mâlımdan ceste ceste verdiğim dört yüz yetmiş dört guruş ve zikr olunan manav dükkânını ta‘mîr eylediğim hînde kezâlik bi-şartı’r-rücû‘ <> emrinle mâlımdan masrûfum olan üç yüz yirmi dört guruş ve yine emrinle dükkân-ı mezkûrun icâresine kezâlik mâlımdan medfû‘um olan on dokuz guruş ki min-haysü’l-mecmû‘ bin beş yüz seksen altı guruş alacak hakkım olmağla taleb ederim deyü benden da‘vâ ve ol vechile beynimizde münâza‘ât-ı kesîre ve muhâsamât-ı vefîre cereyân etmişidi el-hâletü hâzihî muslihîn tavassutuyla beynimiz ıslâh ve te’lîf olunup tarafeynden her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ikrâr ve tasdîkleri <> tescîl ve huzûr-ı [âlîlerine i‘lâm olundu] Fî 8 S sene 1256