Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 331 Hüküm no: 488 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salepçi Debreli Bayram’ın kaybolan beygirini elinde bulunduran Göriceli Osman’ın hayvanı Bayram’a iade etmesi Bârgir teslîmine tenbîh i‘lâmı Ma‘rûz Sa‘lebci esnâfından Debreli Bayram b. Ebubekir nâm kimesne İstanbul Bâb Mahkemesi’nde meclis-i şer‘de mekkârî tâifesinden Göriceli Osman b. Talib muvâcehesinde işbu meclis-i şer‘de mu‘âyene olunan bir re’s seyisli kır bârgir benim mülküm iken beş buçuk ay mukaddem Çorlu mer‘âsında zâyi‘ edip hâlâ mezbûr Osman’ın yedinde bulmamla bi’l-istihkāk taleb ederim deyü da‘vâ ettikde ol dahi cevâbında zikr olunan bârgir târîh-i i‘lâmdan on sekiz gün mukaddem Rumeli’de Samako kazâsında ismi ma‘lûmum olmayan bir kimesneden yüz altmış guruş semen-i medfû‘a iştirâ etmemle ol vechile mülk-i müşterâm olmak üzere vaz‘-ı yed ederim deyü vaz‘-ı yedini ikrâr müdde‘î-i merkūmun mâlı olduğunu inkâr edicek müdde‘î-i merkūm ber-vech-i muharrer müdde‘âsını her biri lede’t-tezkiye adl ve makbûlü’ş-şehâde idikleri ihbâr olunan Debreli Zekeriya b. Abdülfettah ve Debreli Ahmed b. Hayrullah nâm kimesneler şehâdetleriyle bi’l-muvâcehe ber-nehc-i şer‘î ba‘de’l-isbât ve’t-tahallüf mûcebince zikr olunan bârgiri müdde‘î-i merkūm Bayram’a teslîme mezbûr Osman’a tenbîh olunduğu tescîl ve bi’l-iltimâs huzûr-ı [âlîlerine i‘lâm olundu] Fî 13 S sene [12]56