Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 332 Hüküm no: 490 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtip Hamid Reşad Efendi’nin satın aldığı Çerkez cariyesinin ayıplı olduğunu iddiasıyla Esirci Kürt Osman Ağa’ya açtığı davanın reddedildiği Câriye men‘i Ma‘rûz Bâb-ı Seraskerî’de Jurnal Kalemi ketebesinden Hamid Reşad Efendi b. Abdülhamid Efendi b. Abdullah tarafından husûs-ı âti’l-beyânda vekîl olduğu Hasan Ağa b. Mehmed ve İsmail Ağa b. Mehmed nâm kimesneler şehâdetleriyle sâbit olan Asâkir-i Mansûre mühendislerinden Ömer Efendi b. Ahmed nâm kimesne İstanbul Bâb Mahkemesi’nde meclis-i şer‘-i münîrde esirci tâifesinden Kürd Osman Ağa b. Ahmed nâm kimesne muvâcehesinde işbu târîh-i i‘lâmdan bir ay mukaddem cemî‘ uyûbdan sâlime olmak üzere mezbûr Osman Ağa’nın mâlından dört bin guruş semen tesmiyesiyle iştirâ ve kabz eylediğim işbu hâzır[atü] bi’l-meclis Çerkesiyyetü’l-asl Müslimetü’l-mille bir re’s câriye selisü’l-bevl illetiyle mu‘ayyebe ve illet-i mezkûre câriye-i merkūmede şirâ târîhinden kadîm ve inde’t-tüccâr noksân-ı semen îcâb eder uyûbdan olmağla câriye-i mezkûreyi geri ahza merkūm Osman Ağa’ya tenbîh olunmak bi’l-vekâle matlûbumdur deyü da‘vâya tasaddî ettikde evvelen teveccüh-i husûmet için câriye-i mezbûrede bu misillü uyûbu teşhîse memûr hâlâ ser-etibbâ-i cihân-dârî sudûr-ı i‘zâmdan devletlü inâyetlü Abdülhak Efendi hazretlerine irâe olundukda onlar dahi ba‘de im‘âni’n-nazar câriye-i mezkûrede reddi mûcib ilel ve emrâza dâir nesne olmadığını arzuhâl hâmişinde mastûr i‘lâm etmeleriyle mûcebince teveccüh-i husûmet bulunmayıp bu sûretde müdde‘î-i vekîl-i merkūm Ömer Efendi’nin da‘vâsı bî-vech idiği huzûr-ı [âlîlerine i‘lâm olundu] Fî 4 S sene [12]56