Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 333 Hüküm no: 491 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Ayşe Sıddıka Hatun’un geçinemediği kocası Mehmed Emin ile muhalaa yoluyla boşanıp zimmet ibrası yaptıkları <> Muhâla‘a Ma‘rûz İstanbul’da Zeyrek kurbünde Hızırbey mahallesinde sâkine sâhibe-i arzuhâl zâtı mu‘arrefe Şerife Âişe Sıddıka Hatun bt. Mehmed <<İstanbu>> vâlidesi kezâlik mu‘arrefetü’z-zât Fâtıma bt. Mehmed Necib nâm hatun hâzıra olduğu hâlde İstanbul Bâb Mahkemesi’nde meclis-i şer‘de zevc-i muhâlı‘ı derûn-ı arzuhâlde mezkûrü’l-ism Altıncı Mehmed Emin b. Ahmed muvâcehesinde mezbûr Mehmed Emin bin altı yüz guruş mehr-i mu‘accel ve bin iki yüz elli guruş mehr-i müeccel tesmiyeleriyle zevc-i dâhilim olup lâkin beynimizde hüsn-i mu‘âşeretimiz olmamağla mezbûrun zimmetinde mehreyn-i mezkûreynim olan cem‘an iki bin sekiz yüz elli guruş ile nafaka-i iddet-i mu‘ayyene-i ma‘lûm[em] üzerlerine ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyyete ve ibtidâ-i zevciyyetden işbu târîhe gelince sâir cemî‘ hukūk-ı şer‘iyyeye müte‘allika âmme-i da‘vâdan ben ve vâlidem hâzıra-i mezbûre ile ma‘an zevcim mezbûr Mehmed’in zimmetini ol dahi kezâlik hukūk-ı zevciyyete ve ibtidâ-i zevciyyetden işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan <> benimle vâlidem hâzıra-i merkūmenin zimmetlerimizi her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz âharın ibrâsını kabûl eyledik deyü ikrâr ve tasdîkleri huzûr-ı [âlîlerine i‘lâm olundu] Fî 1 S sene [12]56