Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 334 Hüküm no: 492 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âdile Hatun’un boşandığı kocası Mühtedi Mehmed Ali’ye ait çeşitli eşyaları iade etmesi Aynen eşyâ teslîmine teslîm[tenbîh] Ma‘rûz Sâhib-i arzuhâl Mühtedî Mehmed Ali b. Abdullah nâm kimesne İstanbul Bâb Mahkemesi’nde meclis-i şer‘-i münîrde mukaddemâ zevcesi derûn-ı arzuhâlde mezkûretü’l-ism zâtı mu‘arrefe Âdile bt. Ali nâm hatun muvâcehesinde mezbûre Âdile Hatun ile mukaddemâ zevciyyet beynimizde kāime iken benim mâlım olarak altı yüz beş guruş kıymetli dört aded kanarya kuşumu ve iki kehribâ çubuk takımı ve iki kanarya kafesi ve bir yazma İngiliz şalı ve iki anteri ve iki bileziğimi yedinde alıkoyup eşyâ-i muharrere-i mezkûre dahi aynısı mevcûd olmağla eşyâ-i muharrereyi bana teslîme mezbûre Âdile Hatun’a tenbîh olunmak matlûbumdur deyü da‘vâ ettikde ol dahi cevâbında eşyâ-i muharrere-i mezkûre aynen yedinde mevcûd olduğunu bi-tamâmihi ikrâr ü i‘tirâf etmeğin mûcebince eşyâ-i muharrere-i mezkûresi aynen müdde‘î-i merkūm Mehmed Ali’ye teslîme mezbûre Âdile Hatun’a tenbîh olunduğu huzûr-ı [âlîlerine i‘lâm olundu] Fî 15 S sene 1256