Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 334 Hüküm no: 493 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis zimmînin Berber Yorgi’ye açtığı alacak davasının reddedildiği Mu‘ârazadan men‘ Ma‘rûz Ayvaz tâifesinden arzuhâl eden Avanis v. Bedros zimmî tarafından husûs-ı âti’l-beyânda vekîl-i müseccel-i şer‘îsi Berber Yorgi v. Todori nâm zimmî İstanbul Bâb Mahkemesi’nde meclis-i şer‘-i hatîrde derûn-ı arzuhâlde ismi mezkûr Mavnacı Serkiz v. Proz nâm zimmî muvâcehesinde müvekkilim mersûm Avanis zimmî yedinde mâlı olan mavnasını beher şehr iki yüz ellişer guruş icâre tesmiyesiyle mersûm Serkiz zimmîye îcâr ve teslîm eylediğinde ol dahi ba‘de’l-istîcâr bin iki yüz elli dört senesi Saferi’l-hayrı gurresinden elli altı senesi Muharremi’l-harâmı gāyetine gelince yirmi dört ay müddetde mersûmun zimmetinde icâre-i mezkûreden müctemi‘ alacağı olan altı bin guruşun bin yedi yüz seksen guruşunu müvekkil-i mersûma ceste ceste edâ ve teslîm etmekle bâkīsi olan dört bin iki yüz yirmi guruşu mersûm Serkiz zimmîden bi’l-vekâle hâlâ taleb ederim deyü da‘vâ ettikde ol dahi cevâbında işbu yedimde olup şehr-i sâbık Muharremi’l-harâmının on sekizinci günü târîhiyle müverrah Kasımpaşa Mahkeme<>sinden verilen bir kıt‘a i‘lâm-ı şer‘î nâtık olduğu üzere cihet-i mezkûreden beş bin iki yüz guruş müvekkil-i merkūm benden da‘vâ ve ol vechile beynimizde ba‘de vukū‘i’l-münâza‘a beynimiz ıslâh olunup ber-minvâl-i muharrer tasaddî eylediği da‘vâsından bâ-tavassut-ı muslihîn benimle kat‘ li’n-nizâ‘ dört yüz guruş üzerine bi’t-terâzî ba‘de’s-sulh ve’l-kabûl ziyâde müdde‘âsına ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt etmişidik deyü mazmûnu <> min-külli’l-vücûh takrîrine mutâbık ibrâz eylediği i‘lâm-ı mezkûru vekîl-i mersûm Yorgi zimmî bi-tamâmihi ikrâr ü i‘tirâf etmeğin mûcebince müdde‘î-i vekîl-i mersûm Yorgi zimmî bi’l-vekâle da‘vâ-yı mezkûresiyle mersûm Serkiz zimmîye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 6 S sene [12]56