Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 336 Hüküm no: 495 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kireççi Agop’un Kireççi Artin’e olan borcunu ödemesi 214 guruş hüküm [Ma‘rûz] Kireççi tâifesinden Artin v. Simo nâm zimmî İstanbul Bâb Mahkemesi’nde meclis-i şer‘-i hatîrde tâife-i merkūmeden Agop v. Melkon zimmî muvâcehesinde mersûm Agop zimmî zimmetinde işbu târîh-i i‘lâmdan on dört ay mukaddem mâlımdan ve yedimden iktirâz ve kabz eylediği beş yüz guruş ve meblağ-ı mezkûr için eğerçi vech-i şer‘î üzere ilzâm-ı ribh olunmamış ise de mücerred ol mikdâr akçenin mersûmun zimmetinde ber-vech-i mukāvele ribâsı olan seksen yedi buçuk guruş ki cem‘an beş yüz seksen yedi buçuk guruşun seksen bir guruşunu kendi yediyle ve iki yüz beş guruşunu işbu hâzır bi’l-meclis Mesrop zimmî yediyle ki cem‘an iki yüz seksen altı guruşunu istîfâ etmemle bâkīsi olan üç yüz bir buçuk guruşu mesfûr Agop zimmîden taleb ederim deyü da‘vâ ettikde evvelen müdde‘î-i mersûm Artin zimmînin ber-vech-i muharrer seksen yedi buçuk guruş murâbaha müdde‘âsı meşrû‘a olmayıp ancak <> meblağ-ı mezkûr beş yüz guruş husûsunda mersûm Agop zimmî istintâk olundukda cevâbında meblağ-ı mezkûr beş yüz guruş zimmetinde müdde‘î-i mesfûra cihet-i merkūmeden deyni olduğunu ikrâr lâkin müdde‘î-i mersûmun kabzını mu‘terif olduğu iki yüz seksen altı guruşdan başka yine hâzır-ı mersûm Mesrop zimmî yediyle def‘aten yüz elli guruş dahi müdde‘î-i mesfûra edâ ve teslîm etmemle ancak bâkī zimmetimde altmış dört guruş deynim kalmışdır deyü inkâra mukārin mikdâr-ı mezkûrda eylediği def‘ine ikāmet-i beyyine edemeyip bi’t-taleb mersûm Artin zimmî bi’l-muvâcehe vech-i şer‘î üzere tahlîf olunmağın mûcebince dâfi‘-i mersûm Agop zimmî def‘-i mezkûruyla müdde‘î-i mesfûra bilâ-beyyine mu‘ârazadan ba‘de’l-men‘ mersûm Agop zimmînin sâlifü’z-zikr ikrârıyla lâzım gelen meblağ-ı <> bâkī-i mezkûr iki yüz on dört guruşu müdde‘î-i mersûm Artin zimmîye edâ ve teslîme mesfûr Agop zimmîye tenbîh olunduğu mübâşirleri Bâb-ı Seraskerî kavaslarından Üsküdarlı Ahmed Kavas kulları yediyle huzûr-ı [âlîlerine i‘lâm olundu] Fî 2 S sene [12]56