Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 342 Hüküm no: 508 Orijinal metin no: [68b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hediyetullah Hatun’un Mustafa’ya veraset hissesini ödemesi Mîrâsdan 20 guruş hissesi hüküm Ma‘rûz Fi’l-asl Anadolu’da Viranşehir sancağında Şahabeddin kazâsında vâki‘ Paşalı nâm karye ahâlîsinden olup medîne-i Üsküdar’a muzâfe Çengel karyesinde sâkine iken târîh-i i‘lâmdan otuz beş gün mukaddem vefât eden Fâtıma Hatun bt. Mehmed b. Abdullah’ın verâseti li-ebeveyn er karındaşı oğulları Mustafa ve karye-i mezkûrede sâkinler Hasan ve Süleyman ve Mehmed ve Hüseyin ve sulbiye kebîre kızı Havva’ya inhisârı lede’ş-şer‘i’l-enver zâhir ve mütehakkık oldukdan sonra verese-i mezbûrûndan merkūm Mustafa İstanbul Bâb Mahkemesi’nde meclis-i şer‘-i münîrde İstanbul’da Çarşambapazarı kurbünde Beyceğiz mahallesinde sâkine mu‘arrefetü’z-zât Hediyetullah bt. İsmail nâm hatun muvâcehesinde mûrisemiz müteveffât-ı mezbûre hayatında zikr olunan Beyceğiz mahallesinde kâin merkūme Hediyetullah Hatun’un menzilinde ma‘an sâkineler iken mûrisemiz merkūme mârru’z-zikr Çengel karyesine nakleylediğinde mâlından mecmû‘u bin bir guruş kıymetli bir nühâs kova ve bir kazma ve bir kıyma tahtası ve bir su küpü ve bir çuka ferâce ve bir nühâs sini ve bir sahan ma‘a kapak ve iki kahve güğümü ve bir terâzî ma‘a derâhim ve bir diğer kebîr su küpü ve sekiz vakıyye mismâr ve yüz elli vakıyye kömür ve üç aded çevirme çârşeb ve bir kılâbdanlı çevre ve bir kabsız nâfe kürk ve bir nısf ihrâm ve bir şâlî şalvar ve bir çuka seccâde ve üç aded hilâlî gömlek ve üç hilâlî don ma‘a uçkur ve üç kat zenne câmeşûyunu mezbûre Hediyetullah Hatun fuzûlî ve bi-gayri hakkın menzilinde alıkoyup mûrisemiz merkūme eşyâ-i muharrere-i mezkûreyi kable’l-ahz ve’l-istîfâ fevt ve eşyâ-i muharrere-i merkūmeler benimle verese-i sâire-i mezkûresine mevrûs olmağla mevcûde ise aynlarından müstehleke ise ba‘de’s-sübût kıymet-i şer‘iyyelerinden hisse-i irsiye-i şer‘iyyeme isâbet eden yüz seksen iki guruşu mezbûre Hediyetullah Hatun’dan bi’l-verâse tazmîn taleb ederim deyü da‘vâ ettikde mezbûre Hediyetullah Hatun dahi cevâbında müteveffât-ı mezbûrenin mâlından olarak ancak mecmû‘u yüz on guruş kıymetli bir nühâs kova ve bir kazma ve bir kıyma tahtası ve bu su küpü ve bir çuka ferâceyi yedinde alıkoyup istihlâk etmişidim deyü ikrâr ziyâde müdde‘âlarını inkâr etmekle müdde‘î-i mezbûr Mustafa ziyâde müdde‘âlarına ikāmet-i beyyine edemeyip bi’t-taleb merkūme Hediyetullah Hatun bi’l-muvâcehe vech-i şer‘î üzere tahlîf olunmağın mûcebince müdde‘î-i merkūm Mustafa ber-vech-i muharrer ziyâde müdde‘âlarıyla merkūme Hediyetullah Hatun’a bilâ-beyyine mu‘ârazadan ba‘de’l-men‘ mezbûre Hediyetullah Hatun’un sâlifü’l-beyân ikrâr ü i‘tirâfı üzere zikrleri mürûr eden kova ve kazma ve kıyma tahtası ve su küpü ve ferâcenin kıymet-i şer‘iyyeleri olan yüz on guruşdan müdde‘î-i merkūm Mustafa’nın hisse-i irsiyesi olan yirmi guruşu müdde‘î-i mezbûr Mustafa’ya damânen edâ ve teslîme merkūme Hediyetullah Hatun’a tenbîh olunduğu mübâşirleri Bâb-ı Seraskerî kavaslarından <> Edirnekapılı Mehmed Kavas kulları yediyle huzûr-ı [âlîlerine i‘lâm olundu] Fî 12 S sene [1]256