Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 348 Hüküm no: 519 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Hüseyin Efendi’nin Poliçeci Viredor’a açtığı alacak davasının sonuçlanmadığı Mazbata kaydı Ma‘rûz Derûn-ı arzuhâlde mezkûrü’l-ism İstanbul’da Sarachânebaşı’nda Attâr Hüseyin Efendi b. Abdurrahman nâm kimesne İstanbul Bâb Mahkemesi’nde meclis-i şer‘de poliçeci tâifesinden arzuhâl eden Viredor v. Kirhor nâm zimmî muvâcehesinde mersûm Viredor zimmî zimmetinde işbu yedimde olup bin iki yüz elli dört senesi Şevvâli’l-mükerreminin on beşinci günü târîhiyle müverrah mümzâ ve mahtûm bir kıt‘a temessük mantûkunca mâlımdan ve yedimden iktirâz ve kabz ve umûruna sarfla istihlâk eylediği üç yüz guruş alacak hakkım olmağla meblağ-ı mezkûru mersûm Viredor zimmîden hâlâ taleb ederim deyü da‘vâ ettikde ol dahi cevâbında külliyen inkâr etmekle müdde‘î-i merkūm ber-vech-i muharrer müdde‘âsıyla beyâna havâle olunup tarafeyn bir dahi meclis-i şer‘a gelmemeleriyle henüz da‘vâlarına faysal verilmediği sene-i sâbıkā yani bin iki yüz elli beş senesi Zilhiccetü’ş-şerîfesi’nin yirmi beşinci günü târîhiyle müverrah kâtib cerîdesinde mazbût bulunmağın imtisâlen li’l-emri’l-âlî sûret-i zabtı huzûr-ı [âlîlerine i‘lâm olundu] Fî 22 S sene [1]256