Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 349 Hüküm no: 521 Orijinal metin no: [70a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenciye Fâtıma Hanım’ın eşya ve nakit para olmak üzere alacak iddiasıyla Şerife Ayşe Hanım’a açtığı davayı ispat edemediği Men‘ Ma‘rûz Sâhibe-i arzuhâl mu‘arrefetü’z-zât Zenciye Fâtıma Hanım bt. Abdullah İstanbul Bâb Mahkemesi’nde meclis-i şer‘de derûn-ı arzuhâlde ismi mezkûre kezâlik zâtı mu‘arrefe Şerife Âişe bt. es-Seyyid Mehmed nâm hatun muvâcehesinde yedimde mâlım olan mecmû‘u sekiz yüz altmış guruş kıymetli altın üzerine masnû‘ bir zümrüd küpe ve bir hilâlî gömlek ve bir basma anteri ve yün memlû bir döşek ile iki yüz otuz guruş nakdimi bundan akdem mezbûre Şerife Âişe Hatun’un yedine li-ecli’l-hıfz îdâ‘ ve teslîm eylediğimde ol dahi ber-vech-i muharrer yedimden ahz u kabz etmişidi el-hâletü hâzihî eşyâ-i muharrere-i mezkûre mevcûde ise aynıları müstehleke ise bi’s-sübût kıymet-i mezkûreleri olan sekiz yüz altmış guruş ile nakd-i mezkûr iki yüz otuz guruşu mezbûre Şerife Âişe Hatun’dan tamâmen taleb ederim deyü ba‘de’d-da‘vâ ve’l-istintâk ol dahi cevâbında külliyen inkâr etmekle müdde‘iyye-i mezbûre Fâtıma Kadın ber-vech-i muharrer müdde‘âsına ikāmet-i beyyine edemeyip bi’t-taleb mezbûre Şerife Fâtıma Hatun [70b] bi’l-muvâcehe vech-i şer‘î üzere tahlîf olunmağın mûcebince müdde‘iyye-i mezbûre Fâtıma Kadın da‘vâ-yı mezkûresiyle mezbûre Şerife Âişe Hatun’a bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu] Fî 18 S sene 1256