Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 351 Hüküm no: 524 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tömbekici Aci Vartan’ın Şerbethaneci Aci Kostandi’ye açtığı alacak davasında sulh oldukları 100 guruşa sulh Ma‘rûz Tömbekici Aci Vartan v. Kirhor nâm zimmî İstanbul Bâb Mahkemesi’nde meclis-i şer‘-i hatîrde Şerbethâneci Aci Kostandi v. Yordam nâm zimmî muvâcehesinde târîh-i i‘lâmdan bir gün mukaddem mersûmun İstanbul’da Tavukpazarı’nda Sarrâc Hanı derûnunda şerbethânesinde kendiye üç yüz yetmiş beş guruşa mu‘âdil beş aded Mahmudiye altınımı beyaz akçeye tebdîl etmek için mersûm Aci Kostandi zimmî yedine teslîm eylediğimde ol dahi ba‘de’l-ahz zikr olunan altınları tebdîl edip meblağ-ı mezkûr üç yüz yetmiş beş guruşu mersûm Aci Kostandi zimmî bana vermeyip kendi umûruna sarfla istihlâk etmekle meblağ-ı mezkûr üç yüz yetmiş beş guruşu zimmî-i mersûmdan taleb ederim deyü tasaddî eylediğim da‘vâmdan bâ-tavassut-ı muslihîn mersûm Aci Kostandi zimmî ile bi’t-tav‘ ve’r-rızâ yüz guruş üzerine ba‘de akdi’l-musâlahati ve’l-kabûl mâ‘adâ ziyâde müdde‘âma ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yüz guruşu müdde‘î-i mersûm Aci Vartan zimmîye edâ ve teslîme mesfûr Aci Kostandi zimmîye tenbîh olunduğu mübâşirleri Bâb-ı Seraskerî kavaslarından Tophâne[li] Hüseyin Kavas kulları yediyle huzûr-ı [âlîlerine i‘lâm olundu] Fî 26 S sene 1256