Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 351 Hüküm no: 525 Orijinal metin no: [70b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tulumbacı Abranos’a borcu olan Berber Kirhor ve Dellal David’in borçlarını ödemeyi taahhüt ettikleri 250 guruş ile 200 guruş hüküm Ma‘rûz Sâhib-i arzuhâl Tulumbacı Abranos v. Efmas(?) nâm zimmî İstanbul Bâb Mahkemesi’nde meclis-i şer‘-i hatîrde Dellâl David v. Avakim nâm zimmî muvâcehesinde derûn-ı arzuhâlde mastûrü’l-ism Berber Kirhor v. Artin nâm zimmî hâzır olduğu hâlde ben târîh-i i‘lâmdan üç ay mukaddem mersûm David zimmînin delâletiyle hâzır-ı mesfûr Kirhor zimmînin mâlından safka-i vâhide ile nes’eten iştirâ ve kabz eylediğim bir çuka nîmten ve bir <<çekuka>> çuka yelek ve bir çuka şalvar semenlerinden zimmetimde deynim olan sekiz yüz guruşun altı yüz elli guruşunu dâyinim hâzır-ı mersûm Kirhor zimmîye götür ver deyü mersûm David zimmîye verdiğimde ol dahi yedimden ahz u kabz meblağ-ı mezkûr altı yüz elli guruşun beş yüz guruşunu mesfûr David zimmî hâzır-ı mersûm Kirhor zimmîye def‘ ü teslîm etmişiken hâzır-ı mesfûr Kirhor zimmî sene-i sâbıkā Zilhiccetü’ş-şerîfe’nin yirmi dokuzuncu günü Tophâne Mahkemesi’nde zimmetimde deynim olan meblağ-ı mezkûr sekiz yüz guruşun mukaddemâ ancak dört yüz guruşunu mesfûr David zimmî yedinden kabz ve istîfâ eyledim deyip yüz guruş kabzını inkârıyla bâkīsi olan dört yüz guruşu benden da‘vâ ben dahi hâzır-ı mersûm Kirhor zimmîye inanıp meblağ-ı bâkī-i mezkûr [71a] dört yüz guruş zimmetimde deynimdir deyü ikrârıma binâen hükm-i hâkimü’ş-şer‘le meblağ-ı bâkī-i mezkûr dört yüz guruşu dahi benden almağla ziyâde medfû‘um olup yedlerinde bâkī kalan iki yüz elli guruşu vech-i meşrûh üzere zimmîyân-ı mersûmândan istirdâd ederim deyü da‘vâ eylediğimde evvelen mersûm David zimmî cevâbında benim ziyâde medfû‘um olan iki yüz elli guruşdan zimmetinde bana yüz elli guruş damânen deyni olduğunu ikrâr ve yüz guruşunu dahi hâzır-ı mersûm Kirhor zimmîye teslîm etmişidim deyip sâniyen hâzır-ı mesfûr Kirhor zimmî mersûm David zimmî yedinden ziyâde yüz guruş kabzını inkâr etmeğin ol vechile beynimizde ba‘de vukū‘i’l-münâza‘a muslihîn tavassutuyla beynimiz tanzîm ve te’lîf olunup damânen alacak hakkım olan iki yüz elli guruşun iki yüz guruşunu mesfûr David zimmî <> ve elli guruşunu hâzır-ı mesfûr Kirhor zimmîye çendurez (çend rûz) zarfında bana edâya müte‘ahhidler olmalarıyla ben dahi ta‘ahhüdlerini kabûl ve bu vechile kat‘-ı nizâ‘ eyledik deyü ikrâr ve tasâdıkları tescîl ve huzûr-ı [âlîlerine i‘lâm olundu] Fî 10 S sene 1256