Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 353 Hüküm no: 528 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Raşid’in hanımı Şefika’ya mehr-i muaccel bedelini ödemesi 800 guruş mu‘accel hükmü Ma‘rûz İstanbul’da Hırka-i şerîf kurbünde İskenderbey mahallesinde sâkine mu‘arrefetü’z-zât Şefika bt. Ahmed nâm hatun İstanbul Bâb Mahkemesi’nde meclis-i şer‘de hâlâ zevci Mehmed Raşid b. Abdullah nâm kimesne muvâcehesinde mezbûr Mehmed Raşid sekiz yüz guruş mehr-i mu‘accel ve altı yüz bir guruş mehr-i müeccel tesmiyeleriyle zevc-i dâhilim olup lâkin <> mehr-i <> mu‘accel-i mezbûrumu henüz bana edâ ve îfâ etmemekle suâl olunup mehr-i müeccel (mu‘accel)-i mezkûr sekiz yüz guruşu bana edâya zevcim mezbûr Mehmed Raşid’e tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince mehr-i mu‘accel-i mezkûr sekiz yüz guruşun müdde‘iyye-i mezbûre Şefika Hatun’a edâ ve teslîme mezbûr Mehmed Raşid’e tenbîh olunduğu mübâşirleri Bâb-ı Seraskerî kavaslarından Div[ri]ğili Abdullah Kavas kulları yediyle huzûr-ı [âlîlerine i‘lâm olundu] Fî 15 S sene [12]56