Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 354 Hüküm no: 529 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Abdünnebi’nin Anaştaş’a olan borcunu ödemesi Ma‘rûz Mahrûse-i Galata’da Mekabirecioğlu? Anaştaş v. Yorgi nâm zimmî İstanbul Bâb Mahkemesi’nde meclis-i şer‘-i hatîrde Kahveci el-Hâc Abdünnebi b. İsmail nâm kimesne muvâcehesinde benim gāib ani’l-meclis İstilyanos v. Yani v. Atam zimmî zimmetinde cihet-i deyn-i şer‘îden bin altı yüz seksen guruş alacak hakkım olup ol dahi işbu merkūm el-Hâc Abdünnebi zimmetinde cihet-i karzdan ol mikdâr alacağı olmağla medyûnumuz gāib-i mersûm deyn-i mezkûruyla beni işbu merkūm el-Hâc Abdünnebi üzerine bin iki yüz elli beş senesi şehr-i Rebî‘ülâhiri’nin on beşinci günü üçümüz bir meclisde hâzır olduğumuz hâlde havâle-i mukayyede-i sahîha-i şer‘iyye ile havâle ve her birimiz havâle-i mezkûreyi kabûl etmemizle ol vechile merkūm el-Hâc Abdünnebi <<üzerine bin iki yüz elli beş senesi>> zimmetinde cihet-i havâle-i mezkûrdan alacağım olan bin altı yüz seksen guruşun sekiz yüz elli guruşunu mukaddemâ yedinden kabz ve istîfâ etmemle bâkīsi olan sekiz yüz otuz guruşu merkūm el-Hâc Abdünnebi’den havâle-i mezkûreye binâen hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu ikrâr ü i‘tirâf etmeğin mûcebince meblağ-ı bâkī-i mezkûr sekiz yüz otuz guruşu <> müdde‘î-i mersûm Anaştaş zimmîye bi-hükmi’l-havâle edâsıyla merkūm el-Hâc Abdünnebi ilzâm olunduğu huzûr-ı [âlîlerine i‘lâm olundu] Fî 12 S sene 1256