Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 358 Hüküm no: 536 Orijinal metin no: [72a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atiyetullah Hatun’un kocası Mehmed Ali Efendi ile boşandığı Tatlîk Ma‘rûz Medîne-i Üsküdar mahâllâtından Tavâşî Hasanağa mahallesinde sâkine mu‘arrefetü’z-zât Atiyetullah bt. Abdullah nâm hatun İstanbul Bâb Mahkemesi’nde meclis-i şer‘-i münîrde zevc-i mutallıkı Enderûn-ı hümâyûn’dan muhrec el-Hâc Mehmed Ali Efendi b. Mustafa nâm kimesne muvâcehesinde mezbûr Mehmed Ali Efendi altı yüz elli guruş mehr-i mu‘accel ve beş yüz bir guruş mehr-i müeccel tesmiyeleriyle zevc-i dâhilim olup işbu târîh-i i‘lâm günü beni tatlîk etmekle mezbûrun zimmetinde mehreyn-i mezkûreynim olan bin yüz <> elli bir guruş ve mezbûrun zimmetinde cihet-i karzdan alacak hakkım olan yüz elli guruş ki cem‘an bin üç yüz bir guruşu zevcim mezbûr işbu meclis-i şer‘de bana def‘ ü teslîm ve ben dahi yedinden ahz u kabz etmemle hukūk-ı zevciyyete ve ibtidâ-i zevciyyetden işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri mübâşirleri Bâb-ı Seraskerî kavaslarından Halil Kavas kulları yediyle huzûr-ı [âlîlerine i‘lâm olundu] Fî 27 Muharrem sene 12[56]