Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 359 Hüküm no: 540 Orijinal metin no: [72b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Mehmed Ağa’nın Şeyh Mehmed Efendi’ye açtığı alacak davasını ispat edemediği Mu‘ârazadan men‘ Ma‘rûz Kasab esnâfından es-Seyyid Mehmed Ağa b. İbiş nâm kimesne İstanbul Bâb Mahkemesi’nde meclis-i şer‘de Tarîkat-ı Sadiyye meşâyihlerinden es-Seyyid el-Hâc Mehmed Efendi b. Ali nâm kimesne muvâcehesinde merkūm es-Seyyid el-Hâc Mehmed Efendi zimmetinde bundan akdem mâlımdan ve yedimden iştirâ ve kabz [eylediği] ma‘lûmü’l-vezn ve’l-fiyat lahm-ı ganem semeninden üç yüz dört guruş otuz para alacak hakkım olmağla meblağ-ı mezbûru merkūm es-Seyyid el-Hâc Mehmed Efendi’den hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr es-Seyyid Mehmed Ağa ber-vech-i muharrer müdde‘âsına ikāmet-i beyyine edemeyip bi’t-taleb mezbûr es-Seyyid el-Hâc Mehmed Efendi’ye bi’l-muvâcehe vech-i şer‘î üzere yemîn verilmeğin mûcebince müdde‘î-i merkūm da‘vâ-yı mezkûresiyle mezbûr es-Seyyid el-Hâc Mehmed Efendi’ye bilâ-beyyine mu‘ârazadan men‘ olunduğu tescîl ve bi’l-iltimâs huzûr-ı âlîlerine i‘lâm [olundu] Fî 4 Rebî‘ülevvel sene [12]56