Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 360 Hüküm no: 541 Orijinal metin no: [72b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zineti Hanım’ın alacak iddiasıyla kayın pederi Mehmed Ağa’ya açtığı davayı ispat edemediği Mu‘ârazadan men‘ Ma‘rûz Medîne-i Hazret-i Ebâ Eyyûbe’l-Ensârî -radiye anhu Rabbihi’l-bârî- mahâllâtından Takyeciler mahallesinde sâkine sâhibe-i arzuhâl mu‘arrefetü’z-zât Zineti bt. Ömer nâm kimesne İstanbul Bâb Mahkemesi’nde meclis-i şer‘-i şer[î]fde mukaddemâ kayın pederi derûn-ı arzuhâlde ismi mezkûr Mehmed Ağa b. Mehmed Emin nâm kimesne muvâcehesinde bundan akdem merkūm Mehmed Ağa yedine mahrûse-i Galata’ya muzâfe Kasaba-i Kasımpaşa’da Kulak Ahmedkapudân mahallesinde vâki‘ menzilinde mâlımdan beş yüz elli guruş nakdimi li-ecli’l-hıfz îdâ‘ ve teslîm eylediğimde ol dahi ba‘de’l-ahz meblağ-ı mezkûru bana vermeyip bi-gayri hakkın kendi umûruna sarfla istihlâk etmeğin meblağ-ı mezkûr beş yüz elli guruşu merkūm Mehmed Ağa’dan damânen taleb ederim deyü ba‘de’d-da‘vâ ve’l-inkâr müdde‘iyye-i mezbûre Zineti Hatun ber-minvâl-i muharrer müdde‘âsına ikāmet-i beyyine edemeyip bi’t-taleb merkūm Mehmed Ağa bi’l-muvâcehe vech-i şer‘î üzere tahlîf olunmağın mûcebince müdde‘iyye-i mezbûre Zineti Hatun da‘vâ-yı mezkûresiyle merkūm Mehmed Ağa’ya bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu] Fî 29 S sene 1256