Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 362 Hüküm no: 544 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Mustafa Ağa ile hanımı Hanife Hatun’un uhdelerinde bulunan berber gediğine aid kira akdinin feshedilmesi taleplerinin reddedildiği Mu‘ârazadan men‘ Ma‘rûz Sâhib-i arzuhâl Berber esnâfından Mustafa Ağa b. Ali ve mu‘arrefetü’z-zât Hanife bt. Hasan nâm zevcân İstanbul’da Bâb Mahkemesi’nde meclis-i şer‘-i münîrde esnâf-ı merkūmeden derûn-ı arzuhâlde mastûrü’l-ism Nikegos v. Merze(?) nâm zimmî muvâcehesinde İstanbul’da Nuruosmaniye kurbünde Tavukpazarı sûkunda Hazînedâr Hanı tahtında kâin bir bâb berber dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûme ale’l-iştirâki’s-seviyy uhde-i tasarrufumuzda olmağla biz âlât-ı gedik-i mezkûru işbu sene-i mübâreke Muharremi’l-harâmı gurresinden sene-i mezbûre Zilhiccetü’ş-şerîfesi gāyetine değin bir seneliğini mersûm Nikegos zimmîye şehriye dörder yüz guruş icâre tesmiyesiyle îcâr ve teslîm eylediğimizde ol dahi istîcâr ve tesellüm ve kabûl etmişidi el-hâletü hâzihî âlât-ı gedik-i mezkûrun ziyâde ücret ile tâlib-i âharı olduğuna binâen fesh-i akd-i icâre etmemizle ol vechile âlât-ı gedik-i mezkûru bize teslîme mesfûr Nikegos zimmîye cebr olunsun deyü takrîr-i meşrûhları üzere tasaddî eyledikleri da‘vâları âlât-ı gedik-i mezkûr müddet-i ma‘lûme tamâmına değin îcâr olunduğunu mukırr u mu‘terifler iken kable tamâmi’l-müddeti fesh-i icâreye kādirler olmamalarıyla meşrû‘a olmadığı zevcân-ı müdde‘iyyân-ı mezbûrâna tefhîm olunduğu huzûr-ı [âlîlerine i‘lâm olundu] Fî 2 Rebî‘ülevvel sene 1256