Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 362 Hüküm no: 545 Orijinal metin no: [73a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın Ayşe Hanım’a olan borcunu ödemesi 200 guruş müvekkile için teslîme tenbîh Ma‘rûz İstanbul’da Cerrâhpaşa kurbünde Hacıbayram Haftânî mahallesinde sâkine Âişe Hatun bt. Abdullah b. Abdurrahman’ın zevci ve tarafından husûs-ı âti’l-beyânda vekîl olduğu zâtını ârifân mahalle-i mezbûre imâmı Mehmed Emin Efendi b. Ali ve el-Hâc Mehmed b. Ali nâm kimesneler şehâdetleriyle ber-nehc-i şer‘î sâbit olan Asâkir-i Mansûre-i şâhâne mülâzımlarından Ömer Ağa b. Ahmed nâm kimesne İstanbul Bâb Mahkemesi’nde meclis-i şer‘-i münîrde es-Seyyid Mustafa Ağa b. Mustafa muvâcehesinde zevcem ve müvekkilem mezbûrenin mezbûrun zimmetinde bundan akdem mâlımdan ve yedimden iktirâz ve kabz ve umûruna sarfla istihlâk eylediği iki yüz guruş alacak hakkım olmağla meblağ-ı mezkûru merkūm es-Seyyid Mustafa Ağa’dan bi’l-vekâle hâlâ taleb ederim deyü da‘vâ ettikde ol dahi cevâbında ikrâr lâkin meblağ-ı mezkûr iki yüz guruşu müvekkile-i mezbûre Âişe Hatun emriyle umûr-ı lâzıme-i ma‘lûmesine harc u sarf etmişidim deyü müdde‘î-i vekîl-i merkūmun inkârına mukārin eylediği <> def‘ine ikāmet-i beyyine edemeyip istihlâf ettikde taraf-ı şer‘den me’zûnen irsâl olunan Kâtib Hasan Hüseyin Efendi mahalle-i mezbûrede vâki‘ müvekkile-i merkūmenin menzilinde akdeylediği meclis-i şer‘de müvekkile-i merkūme Âişe Hatun bi’l-muvâcehe vech-i şer‘î üzere tahlîf olunduğunu kâtib-i merkūm <> meclis-i şer‘a gelip inhâ ve takrîr etmeğin mûcebince dâfi‘-i merkūm es-Seyyid Mustafa Ağa def‘-i mezkûruyla müvekkile-i mezbûre [73b] Âişe Hatun’a bilâ-beyyine mu‘ârazadan <> ba‘de’l-men‘ merkūm es-Seyyid Mustafa Ağa’nın sâlifü’l-beyân ikrâr ü i‘tirâfı mûcebiyle lâzım gelen meblağ-ı mezbûr iki yüz guruşun müvekkile-i mezbûre Âişe Hatun için zevci vekîl-i merkūm Ömer Ağa’ya edâ ve teslîme merkūm es-Seyyid Mustafa Ağa’ya tenbîh olunduğu mübâşirleri Bâb-ı Seraskerî kavaslarından Hüseyin Kavas kulları yediyle huzûr-ı [âlîlerine i‘lâm olundu] Fî 6 S sene [12]56