|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 130 Hüküm no: 119 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Kargı kazası Lore köyündeki Şeyh-i Kut Ali Tekkesi tekke-nişinlerinden Derviş b. Mustafa’nın vefatıyla hissesinin Emiroğlu Osman’a verilmesi
Ma‘rûz-ı dâ‘î,
Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da Kargı kazâsında Lore karyesinde Şeyh Kut Ali Tekkesi’nin nısf hisse vazîfe-i mu‘ayyene ile tekye-nişînliğe bâ-berât-ı âlî mutasarrıfları Mahmud ve Derviş ibney Mustafa nâm karındaşlardan merkūm Derviş bilâ-veled fevt olup vazîfe-i mersûmesiyle kendüye tevcîh olunmasını işbu sahib-i arzuhâl Emiroğlu Osman dâ‘îleri arzuhâl ile istid‘â ve tekye-nişînlik-i mezkûr vazîfe-i mersûmesiyle el-yevm bâ-berât-ı âlî iştirâken merkūmân Mehmed ve Derviş nâm karındaşların üzerlerinde olduğu derkenârdan müstebân ve merkūm Derviş bilâ-veled fevti vâki‘ ve sahib-i [arzuhâl] Emiroğlu Osman her vechile erbâb-ı istihkākdan idiği kazâ-i mezbûr ahâlîsinden Der-aliyye’de müsâfiren sâkinler Süleyman b. İsmail ve Hasan b. Mehmed nâm kimesnelerin alâ-tarîkı’ş-şehâde haber vermeleriyle zâhir ve mütehakkık olmağın nısf hisse tekye-nişînlik-i mezkûre müteveffâ-yı merkūmun bilâ-veled mahlûlünden sahib-i arzuhâl Emiroğlu Osman dâ‘îlerine tevcîh ve yedine berat-ı şerîf-i âlîşân sadaka ve ihsân buyurulmak husûsu re’y-i sâmîlerine menût idiği huzûr.
|