.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 130
Hüküm no: 120
Orijinal metin no: [24b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Bayburd Yakutiye Medresesi Vakfı türbedârı Seyyid Mehmed Burhaneddin b. Hasan’ın azledilerek yerine Seyyid Ahmed’in tayini

Sâdır olan fermân-ı âlîlerine imtisâlen işbu arz [ve] derkenâra nazar olundukda vilâyet-i Anadolu’da Bayburd-ı Erzurum kazâsında vâki‘ Yakutiye Medresesi Vakfı’ndan olmak üzere yevmî iki akçe vazîfe ile türbedârlık cihetine mutasarrıf olan es-Seyyid Mehmed Burhaneddin b. Hasan Gümüşhane sükkânından olup türbe-i mezkûrun asla semtine uğramayarak hizmet-i lâzımesi mu‘attal kalmağla türbe-i mezkûre harâb ve münhedim olacağından merkūm es-Seyyid Mehmed Burhaneddin ref‘inden türbe-i mezbûrenin civârında salâh ile ma‘rûf es-Seyyid Ahmed b. ( ) her vechile ehliyet ve ünsiyet ve erbâb-ı istihkākdan olmağla merkūm es-Seyyid Mehmed Burhaneddin’in ref‘inden mezbûr es-Seyyid Ahmed’e tevcîh olunmasını kazâ-i mezbûr nâibi es-Seyyid Hâfız Mehmed Salih Kadri Efendi dâ‘îlerinin işbu mührü mutâbık arzından fi’l-hakīka cihet-i mezkûre merkūm es-Seyyid Mehmed Burhaneddin üzerinde olduğu derkenârdan müstebân ve merkūm es-Seyyid Mehmed Burhaneddin’in edâ-i hizmet ve tarafından vekîl nasb edinmediğine ve mezbûr es-Seyyid Ahmed mahâll-i mezbûreye karîb olup vücûd-ı ehliyeti kazâ-i mezbûr ahâlîsinden müsâfiren sâkinler Abdi b. Mehmed ve Mustafa b. İbrahim nâm kimesnelerin alâ-tarîkı’ş-şehâde haber vermeleriyle zâhir ve bedîdâr olmağın bu sûretde ber-mûceb-i arz cihet-i mezkûre merkūm es-Seyyid Mehmed Burhaneddin’in târikü’l-hizmet olduğuna binâen ref‘inden istihkākdan es-Seyyid Ahmed’e tevcîh ve yedine müceddeden berat-ı celîlü’l-unvân ihsân buyurulmak re’y-i veliyyü’l-emrindir.