Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 365 Hüküm no: 550 Orijinal metin no: [73b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tülbentçi Agop ile Mardiros’un Dellal Agop’a olan borçlarını ödemesi 1500 guruş hüküm Ma‘rûz Dellâl Agop v. Bogos nâm zimmî İstanbul Bâb Mahkemesi’nde meclis-i şer‘-i münîrde Tülbentçi diğer Agop v. Anbarsum ve Mardiros v. Mıgırdıç nâm zimmîler muvâcehelerinde mersûmân diğer Agop ve Mardiros zimmîler zimmetlerinde yedimde olup bin iki yüz elli beş senesi Muharremi’l-harâmı’nın dördüncü günü târîhiyle müverrah Ermeniyü’l-imlâ bir kıt‘a temessük mantûkunca bi’l-ma‘iyye mâlımdan ve yedimden iştirâ ve kabz eyledikleri manifatura ta‘bîr olunur basma ve şeytan bezi semenlerinden dört bin beş yüz guruş alacak hakkımın üç bin guruşunu zahr-ı temessük mantûkunca mukaddemâ mersûmândan kabz ve istîfâ etmemle bâkīsi olan bin beş yüz guruşu mersûmân Agop ve Mardiros zimmîden hâlâ taleb ederim deyü da‘vâ ettikde onlar dahi cevâblarında ber-vech-i muharrer ikrâr ü i‘tirâf etmeleriyle alâ-mûcibi i‘tirâfihâ meblağ-ı bâkī-i mezkûr bin beş yüz guruşun müdde‘î-i mersûm Agop zimmîye bi’l-ma‘iyye edâ ve teslîmleriyle mersûmân diğer Agop ve Mardiros zimmîler [74a] ilzâm olundukları mübâşirleri Bâb-ı Seraskerî kavaslarından Beykozlu Mustafa Kavas kulları yediyle huzûr-ı [âlîlerine i‘lâm olundu] Fî 8 Rebî‘ülevvel sene 1256