Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 366 Hüküm no: 551 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kethüda Osman Ağa’nın Kayıkçı Mehmed’e kalan borcunu ödemesi 200 guruş hüküm Ma‘rûz Kayıkçı Mehmed b. Halil nâm kimesne İstanbul Bâb Mahkemesi’nde meclis-i şer‘-i münîrde İstanbul’da Cibâli <> İskelesi hamallar kethüdâsı Osman Ağa b. Eyüb nâm kimesne muvâcehesinde mezbûr Osman zimmetinde cihet-i kefâlet-i sahîhadan bâ-i‘lâm-ı şer‘î mahkûmün-bih üç yüz elli guruş alacak hakkım olmağla meblağ-ı mezbûr üç yüz elli guruşu merkūm Osman Ağa’dan tahsîl olunması murâdımdır deyü da‘vâ ettikde ol dahi cevâbında ikrâr lâkin ben meblağ-ı mekfûlün-bih-i mezkûrun yüz elli guruşunu müdde‘î-i mezbûra edâ etmelle ancak zimmetimde iki yüz guruş deynim kalmışdır deyü müdde‘î-i mezbûrun inkârına mukārin eylediği def‘ini her biri mahallerinde lede’t-tezkiye adl ve makbûlü’ş-şehâde idikleri ihbâr olunan Hamal Hasan b. Osman ve Kahveci Mehmed b. Abdullah nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘î-i mezbûr ziyâde meblağ-ı mezkûr yüz elli guruş müdde‘âsıyla <> mezbûr Osman Ağa’ya bî-vech-i şer‘î mu‘ârazadan ba‘de’l-men‘ sâlifü’z-zikr ikrârı mûcebince meblağ-ı bâkī-i mezkûr iki yüz guruşu merkūm Osman’dan tahsîl ve müdde‘î-i merkūm Mehmed’e teslîm ettirilmek iktizâ eylediği mübâşirleri Bâb-ı Seraskerî kavaslarından Gümüşhaneli Ali Kavas kulları yediyle huzûr-ı [âlîlerine i‘lâm olundu] Fî 3 Rebî‘ülevvel sene [12]56