Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 366 Hüküm no: 552 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaymakçı Ali Ağa’nın süt bedelinden kalan borcunu İsmail Ağa’ya ödemesi 400 guruş hüküm Ma‘rûz Duhân kıyıcı esnâfından İsmail Ağa b. Ahmed tarafından zikr-i âtî meblağ[ı] taleb ve da‘vâ ve ahz[a] vekîl olduğu Süleymaniye <> İmâreti hademesinden Eyüb Ağa b. Mehmed ve Süleyman Ağa b. Mehmed Emin nâm kimesneler şehâdetleriyle sâbit olan Mehmed Rauf Ağa b. Osman nâm kimesne İstanbul Bâb Mahkemesi’nde meclis-i şer‘-i münîrde kaymakçı esnâfından Ali Ağa b. İbrahim nâm kimesne muvâcehesinde müvekkilim merkūmun mezbûr Ali Ağa zimmetinde târîh-i i‘lâmdan üç sene mukaddem müvekkilim merkūmun mâlından ve yedinden iştirâ ve kabz eylediği ma‘lûmü’l-mikdâr süd semeninden iki bin dokuz yüz yirmi dört guruşdan bâkī dört yüz guruş alacak hakkım olmağla meblağ-ı bâkī-i mezkûr dört bin guruşu merkūm Ali Ağa’dan bi’l-vekâle hâlâ taleb ederim deyü da‘vâ ettikde ol dahi cevâbında vekîl-i merkūm Mehmed Ağa’nın müdde‘âsını bi-tamâmihâ ikrâr lâkin deynim olan meblağ-ı bâkī-i mezkûr dört yüz guruşu asıl-ı merkūm İsmail Ağa’ya bundan akdem edâ ve teslîm etmişidim deyü müdde‘î-i vekîl-i merkūmun inkârına mukārin eylediği def‘ine ityân-ı beyyineden ızhâr-ı acz edip mûcebince merkūm Ali Ağa def‘-i mezkûruyla vekîl-i merkūm Mehmed Ağa’ya mevkūfen alâ-yemîni’l-müvekkili’l-mezbûr bilâ-beyyine mu‘ârazadan ba‘de’l-men‘ mezbûr Ali Ağa’nın ikrâr ü i‘tirâfı mûcebince lâzım gelen meblağ-ı bâkī-i mezbûr dört yüz guruşu müvekkil-i mezbûr için müdde‘î-i vekîl-i mezbûr Mehmed Ağa’ya edâ ve teslîme merkūm Ali Ağa’ya tenbîh olunduğu mübâşirleri Bâb-ı Seraskerî kavaslarından Moravî Hüseyin Kavas kulları yediyle huzûr-ı [âlîlerine i‘lâm olundu] Fî 3 Rebî‘ülevvel sene 1256