Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 367 Hüküm no: 553 Orijinal metin no: [74a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duvarcı esnafından Mihal, Hristo ve Dimitri’nin Keresteci Hasan Ağa’ya açtıkları alacak davasında sulh oldukları 600 guruşa sulh Ma‘rûz Duvarcı tâifesinden Mihal v. Yani ve Hristo v. Yanko ve Dimitri v. diğer Yanko nâm zimmîler İstanbul Bâb Mahkemesi’nde meclis-i şer‘-i hatîrde Keresteci es-Seyyid Hasan Ağa b. es-Seyyid Ömer nâm kimesne muvâcehesinde İstanbul’da Cibâlikapısı dâhilinde Seferikoz mahallesinde vâki‘ merkūm Hasan Ağa’nın ma‘lûmü’l-<>hudûd mutasarrıf olduğu menzil arsasında üç ay müddet duvarcılık <> etmemizle müddet-i mezkûrede <> müctemi‘ mezbûrun zimmetinde ecr-i mislimiz olan bin <> yüz guruşun beş yüz guruşunu mukaddemâ merkūmun yedinden kabz ve istîfâ etmemizle bâkīsi olan altı yüz guruşu merkūm es-Seyyid Hasan Ağa’dan hâlâ taleb ederim [ederiz] deyü tasaddî eylediğimiz da‘vâmızdan bâ-tavassut-ı muslihîn merkūm es-Seyyid Hasan Ağa ile bi’t-tav‘ ve’r-rızâ dört yüz guruş üzerine ba‘de akdi’l-musâlahati ve’l-kabûl bedel-i sulh-ı mezkûrdan mâ‘adâ ziyâde müdde‘âmıza ve bi’l-cümle husûs-ı mezkûra ve işbu târîhe gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile <> kabûlü hâvî ibrâ ve iskāt eyledik deyü ba‘de’d-da‘vâ ve’l-ikrâr ve’t-tasdîk ibrâdan müstesnâ bedel-i sulh-ı mezkûr dört yüz guruşun müdde‘iyyûn-ı mersû[m]ûn] Mihal ve Hristo ve Dimitri zimmîlere edâsıyla merkūm es-Seyyid Hasan Ağa ilzâm olunduğu huzûr-ı [âlîlerine i‘lâm olundu] Fî 2 Rebî‘ülevvel sene 1256