|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 131 Hüküm no: 121 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Çubukâbad kazasındaki Gülbaba Zaviyesi zâviyedar, türbedâr ve tekkenişini olan Seyyid Mehmed Ârif b. Seyyid Halil Bey’in görevlerini Seyyid Şehabeddin b. Seyyid Hasan’a devretmesi
Sâdır olan fermân-ı âlîlerine imtisâlen medîne-i Ankara nâibi es-Seyyid Hasan Tahir Efendi dâ‘îlerinin mührü mutâbık arzıyla rûznâmçe-i askerî kaleminden muhrec derkenâra nazar olundukda Anadolu’da Ankara sancağında Çubukâbad kazâsında vâki‘ Gülbaba Zâviyesi’nin vazîfe-i mu‘ayyene ile zâviyedâr ve türbedâr ve tekke-nişîni olan es-Seyyid Mehmed Ârif b. es-Seyyid Halil Bey bâ-berât-ı âlî mutasarrıf olduğu cihât-ı mezkûrâtın kendi hüsn-i rızâsıyla erbâb-ı istihkākdan ve ehl-i sünnetden derûn-ı arzda mezkûrü’l-ism es-Seyyid Şehabeddin b. Seyyid Hasan dâ‘îlerine ferâğat ve kasr-ı yed edip yedinde olan beratını dahi teslîm ettiğini arz-ı mezkûr meâlinden müstefâd olmuş ise de vâki‘ olan teveccühâtın Hacı Bektaş-ı Veli seccâde-nişîni arzıyla olageldiği ve bu makūle Hacı Bektaş-ı Veli seccâde-nişîni arzıyla tevcîh [oluna]gelen tekâyâ ve zevâyânın ahkâmı ilgā olunmağla bundan böyle istid‘â vukū‘unda muhallefâtdan mukayyed irâde-i seniyye kaydına mürâca‘at ve Mukāta‘at Hazînesi tarafından i‘lâm olunmadıkça berat verilmemesi muahharan sünûh eden irâde-i aliyye muktezâsından idiği askerî rûznâmçesinden ve zâviye-i mezkûrenin me’mûrîn ma‘rifetiyle zabt ve tahrîrine dâir bir gûne kaydı bulunmadığı muhallefâtdan başka derkenâr olundukdan sonra zâviye-i mezbûrenin teveccühâtı Hacı Bektaş-ı Veli seccâde-nişîni arzıyla olagelen zevâyâdan ise de zâviyedârı ehl-i sünnet ve’l-cemâ‘atden olup bir aded tarla ve öşrine münhasır idiği mukaddemâ mahâllinde ma‘rifet-i şer‘le tahkīk ederek zâviyedârına terk olunmuş olmağla bu sûretde zâviye-i mezkûre mülgā Bektâşî zevâyâsından olarak Mukāta‘at Hazînesi’nden zabtolunmadığına binâen istid‘â olunan husûs hazîne-i merkūmeye dokunur mevâddan olmadığı mukāta‘at nâzırı sa‘âdetlü atûfetlü Mehmed Emin Efendi bendeleri ve i‘lâmdan müstebân ve merkūm es-Seyyid Mehmed Arif’in sahib-i berat olup kendi hüsn-i rızâsıyla mezbûr es-Seyyid Şehabeddin b. es-Seyyid Hasan cihet-i mezkûreyi ferâğ ve kasr-ı yed vâki‘ idiği medîne-i mezbûr ahâlîsinden Der-aliyye’de müsâfiren sâkinler Mehmed b. Mustafa ve Ahmed b. Mehmed nâm kimesnelerin alâ-tarîkı’ş-şehâde haber vermeleriyle sahîh ve bedîdâr olmağın bu sûretde cihât-ı mezkûrenin teveccühündeaslâ be’s ve mahzûr kalmamağla fâriğ-i merkūmun kasr-ı yedinden vazîfe-i mersûmesiyle mezbûr es-Seyyid Şehabeddin b. es-Seyyid Hasan’a ber-mûceb-i arz tevcîh ve yedine müceddeden berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu.
|