Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 373 Hüküm no: 565 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sıvacı Vartan’ın hanımı adına Poliçeci Avanis’e ödediği paranın geri verilmesi talebiyle açtığı davanın reddedildiği Adem-i iltifât Ma‘rûz Sıvacı tâifesinden Vartan v. Avanis nâm zimmî İstanbul Bâb Mahkemesi’nde meclis-i şer‘-i hatîrde Poliçeci Avanis v. Karabet nâm zimmî muvâcehesinde Anadolu’da medîne-i Kayseriye nevâhîsi kurâlarından Tomarza nâm karyede mütemekkine hâlâ zevcem olup Erayi bt. Karabet nâm Nasrâniyenin mersûm Avanis zimmînin şerîki karye-i mezbûrede mütemekkin Şahbazoğlu Serkiz zimmîye bin iki yüz elli beş senesi Muharremi’l-harâmının on ikinci günü târîhiyle müverrah bir kıt‘a temessük mantûkunca cihet-i deyn-i şer‘îden beş yüz guruş deyni olup zevcem gāibe-i mersûme Araye Nasrâniye deyni olan meblağ-ı mezkûr beş yüz guruş ile dâyini gāib-i mersûm Serkiz zimmîyi benim üzerime havâle-i mutlaka ile kabûlüme mevkūfe havâle eylediğinde ben dahi kabûl ve meblağ-ı muhâlün-bih-i mezkûrun iki yüz guruşunu mesfûr Serkiz zimmînin şerîki ve kabza vekîli işbu mersûm Avanis zimmîye sene-i mezbûre Cumâdelâhiresi’nin on birinci gününde edâ ve teslîm ve bâkī üç yüz guruşunu dahi edâya müte‘ahhid olmuşidim lâkin havâle-i mezkûreyi kabûl ve meblağ-ı muhâlün-bih-i mezkûrun iki yüz guruşunu vermiş isem de ba‘dehu zevcem gāibe-i mesfûre bana mektûb gönderip meblağ-ı muhâlün-bih-i mezkûr beş yüz guruşu mesfûr Serkiz zimmî tamâmen benden almağla havâleyi kabûl etmeyesin deyü bana tahrîr etmekle öyle olacak medfû‘um olan meblağ-ı merkūm iki yüz guruşu mesfûr Avanis zimmîden istirdâd ederim deyü takrîr-i meşrûhu üzere havâle-i mezkûreyi kabûlunü mukırr u mu‘terif bu mertebe ile tasaddî eylediği da‘vâsı meşrû‘a ve iltifâta şâyân olmadığı müdde‘î-i mersûm Vartan zimmîye tefhîm ve da‘vâ-yı mezkûresiyle mersûm Avanis zimmîye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 6 Şevvâl sene 1255