|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 132 Hüküm no: 122 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Sivas kazası Çatviran köyü camisinin imamet, hitabet ve tevliyetinin Seyyid Hafız Abdüsselam Efendi’de kalması
Anadolu’da Sivas kazâsında Çatviran karyesinde vâki‘ Derdiyaroğlu câmi‘-i şerîfi vakfından almak üzere yevmî iki buçuk akçe hitâbet ve bir sehm ile vakfın tevliyetine es-Seyyid Ahmed Halîfe b. Mustafa mahlûlünden işbu sene-i mübâreke Saferü’l-hayrın on beşinci günü târihiyle müverrah bir kıt‘a berat-ı âlîşân ile mutasarrıf olan sahib-i arzuhâl Sivâsî es-Seyyid Hâfız Abdüsselam Efendi Der-aliyye’de sâkin olduğundan bu def‘a kazâ-i mezbûr nâibi es-Seyyid Mahmud Kâmil Efendi merkūm es-Seyyid Hâfız Abdüsselam Âsitâne-i aliyye’de müteehhil ve ikāmet üzere olup imâmet ve hitâbet ve tevliyet hizmetleri mu‘attal kalmağla ahâlîsi evkāt-ı hamsede cemâ‘at ve cümle îdeyn savâblarından dûr ve mahrûm kaldıklarını ve cihât-ı mezbûre mezbûrun ref‘inden es-Seyyid Mehmed Necati [25a] b. es-Seyyid Mahmud Halîfe[‘ye] tevcîh olunup yedine berat-ı şerîf-i âlîşân inâyet ve ihsân olunması bir kıt‘a i‘lâm ve ahâlîsinin bir kıt‘a mahzar ile istid‘â ve merkūm es-Seyyid Hâfız Abdüsselam Efendi istintâk için mukaddemâ tahrîr olundukda Der-aliyye’de mevcûd olmayıp Rumeli cânibine âzim olmuşdur deyü haber verdiklerinden imâmet ve hitâbet ve tevliyet cihetleri merkūmun ref‘inden mezbûr es-Seyyid Mehmed Necati Halîfe’ye tevcîh ve yedine berat-ı âlîşân inâyet ve ihsân buyurulması husûsu emr-i âlîlerine menût olarak taraf-ı dâ‘iyânemizden i‘lâm olundukdan sonra i‘lâmımız bâlâsına i‘lâmları mûcebince tevcîh olunmak deyü üzeri sahh-ı mekârim-semhle müveşşah fermân-ı âlî sudûr edip ancak ruûs-ı hümâyûnu tahrîr olmaksızın mezbûr es-Seyyid Hâfız Abdüsselam karındaşım olup karye-i mezbûrede sâkin Osman Efendiyi tarafımdan vekîl nasb u ta‘yîn ile hıdemât-ı mezkûreyi vakt [ü] zaman ile edâ ettirip kat‘â tekâsül etmedim, ancak mezbûr es-Seyyid Mehmed Necati nâib-i mezbûr es-Seyyid Mahmud Kâmil Efendi’nin sulbî sahîh oğlu olup bir-takrîb ahâlîden mahzar ahz ile i‘lâm tahrîr ve temhîr etdirmekle fîmâ-ba‘d cihât-ı mezbûrenin def‘i husûsuna tesâddî ederi olur ise Der-aliyye’ye gelip Cuma günü arz odasında huzûr-ı hazret-i sadâret-penâhîde terâfu‘-i şer‘ olunmadıkça âhara tevcîh olunmamak üzere cihât-ı mezkûre vazîfe-i mersûmeleriyle merkūm es-Seyyid Hâfız Abdüsselam üzerinde kemâ-kân ibkā kılınıp ruûs-ı hümâyûn ve Anadolu kalemlerine ilmühaberi verilmek üzere emr-i âlîleri sudûru iktizâ eylediği imtisâlen li-emri’l-âlî huzûr.
Fî 8 B sene [12]49
|