Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 375 Hüküm no: 569 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Aci Serope’nin Kömürcü Hüseyin’den kiraladığı berber gediğinin kira akdinin feshi talebiyle açtığı davanın reddedildiği Kahve dükkânı fesh-i icâresi Ma‘rûz Berber tâifesinden Aci Serope v. Velvet nâm zimmî İstanbul Bâb Mahkemesi’nde meclis-i şer‘de kömürcü esnâfından Hüseyin b. ( ) muvâcehesinde merkūm Hüseyin işbu bin iki yüz elli altı senesi Muharremi’l-harâmı gurresinde İstanbul’da Samatya nezdinde eski karakolhâne civârında vâki‘ bir bâb berber dükkânı derûnunda beyne’l-esnâf gedik ta‘bîr olunur bâ-temessük mutasarrıf olduğu vakıf âlât-ı lâzıme-i ma‘lûmesini aded-i şühûr beyân olunmaksızın beher şehr altmışar guruş kirâ mukāvelesiyle bana îcâr ve teslîm ben dahi istîcâr ve tesellüm ve kabûl etmişidim el-hâletü hâzihî benim işbu târîh-i i‘lâm şehri gāyetinde fesh-i akd-i icâre olunmak matlûbumdur deyü da‘vâ ettikde ol dahi cevâbında âlât-ı gedik-i mezkûru ber-vech-i muharrer şehriye altmışar guruş kirâ mukāvelesiyle sene-i mezbûre Zilhiccetü’ş-şerîfesi gāyetine değin bir seneliğini müdde‘î-i merkūma îcâr etmişidim deyü müdde‘î-i mersûmun inkârına mukārin eylediği da‘vâsını her biri <> lede’t-tezkiye adl ve makbûlü’ş-şehâde idikleri ihbâr olunan Yenikapı’da hamallar kethüdâsı es-Seyyid Mehmed Emin b. es-Seyyid Ahmed ve Kömürcü Ali b. İsmail nâm kimesne şehâdetleriyle bi’l-muvâcehe vech-i şer‘î üzere isbât etmeğin mûcebince âlât-ı gedik-i mezkûru kable tamâmi’l-müddeti’l-mezbûre fesh-i akd-i icâreye kādir olmadığı müdde‘î-i mersûm Serope zimmîye tefhîm olunduğu mübâşirleri Bâb-ı Seraskerî kavaslarından Kasımpaşalı İbrahim Kavas kulları yediyle huzûr-ı [âlîlerine i‘lâm olundu] Fî 17 S sene 1256