Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 376 Hüküm no: 570 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neccar Lazari’nin bazı eşyalarını aldığı iddiasıyla Eskici Edhem Ağa’ya açtığı davayı ispat edemediği Men‘ Ma‘rûz Neccâr tâifesinden Lazari v. Esteryo nâm zimmî İstanbul Bâb Mahkemesi’nde meclis-i şer‘-i hatîrde eskici esnâfından Edhem Ağa b. Mustafa nâm kimesne muvâcehesinde târîh-i i‘lâmdan dokuz gün mukaddem merkūm Edhem Ağa İstanbul’da Drağman kurbünde Tercümanyunus mahallesinde işbu hâzır bi’l-meclis Ahmed nâm kimesnenin mutasarrıf olduğu bir bâb vakıf bahçesinde <> müşâhereten müsteciren mütemekkin olduğum odamın penceresini şikest birle oda-i mezkûrda tahta sandığım derûnunda <> mevcûd eşyâ-i memlûkemden mecmû‘u üç yüz altmış guruş kıymetli bir zeytunî çuka şalvar ve bir lâciverd çuka anteri ve bir çuka saltamarka ve bir şâlî anteri ve bir Amerikan bez dizlik ve bir şervete ve bir yün kuşak ve bir kalemkârî sarı yemenîmi merkūm Edhem Ağa hufyeten ahz u kabz etmekle eşyâ-i muharrere-i mezkûre mevcûde [ise] aynlarını değil ise <> bi’s-sübût kıymet-i şer‘iyyelerini merkūm Edhem Ağa’dan damânen taleb ederim deyü ba‘de’d-da‘vâ ve’l-inkâr müdde‘î-i mersûm ber-vech-i muharrer müdde‘âsına ikāmet-i beyyine edemeyip tahlîfe dahi tâlib olmamağın mûcebince müdde‘î-i mersûm Lazari zimmî da‘vâ-yı mezkûresiyle merkūm Edhem Ağa’ya bilâ-beyyine mu‘ârazadan men‘ olunduğu mübâşirleri Bâb-ı Seraskerî kavaslarından Salmatomruklu Ali Kavas kulları yediyle huzûr-ı [âlîlerine i‘lâm olundu] Fî 7 Rebî‘ülevvel sene [1]256