Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 377 Hüküm no: 571 Orijinal metin no: [76a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırşehirli Mehmed’in alacak iddiasıyla Şeyh Muhiddin Efendi’ye açtığı davada sulh olduğu 100 guruş sulh Ma‘rûz Teba‘adan Kırşehrî el-Hâc Mehmed Ağa b. Memiş nâm kimesne İstanbul Bâb Mahkemesi’nde meclis-i şer‘-i münîrde Ayıntâbîzâde eş-Şeyh Muhyiddin Efendi b. el-Hâc Mehmed nâm kimesne muvâcehesinde Anadolu’da Bozok <> sancağı mütesellimi kethüdâsı Yusuf Efendi bin iki yüz elli bir senesi hilâlinde sancağ-ı mezbûr mütesellimi kethüdâsı iken beni bir cürmle ithâm dâ‘iyesiyle habs <> eylediği hînde mezbûr eş-Şeyh Muhyiddin Efendi seni habisden halâs <> ettiririm deyü mâlımdan bi-tarîkı’r-rüşve nakd iki yüz yetmiş guruş ile yüz yirmi guruş kıymetli iki aded seccâdemi ahz ve istihlâk etmekle medfû‘um olan meblağ-ı merkūm iki yüz yetmiş guruş ile sâlifü’z-zikr seccâdelerin kıymet-i mezkûreleri olan yüz yirmi guruş ki cem‘an üç yüz doksan guruşu eş-Şeyh Muhyiddin Efendi’den hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūm eş-Şeyh Muhyiddin Efendi ile bi’t-tav‘ ve’r-rızâ yüz guruş üzerine ba‘de akdi’l-musâlahati ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târîhe gelince sâir cemî‘ hukūk-ı şer‘iyye[ye] müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü <> ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yüz guruşu müdde‘î-i merkūm el-Hâc Mehmed Ağa’ya edâ ve teslîme merkūm eş-Şeyh Muhyiddin Efendi’ye tenbîh olunduğu mübâşirleri Bâb-ı Seraskerî kavaslarından Üsküdarlı Mehmed Kavas kulları yediyle huzûr-ı [âlîlerine i‘lâm olundu] Fî 2 Rebî‘ülevvel sene [1]256