Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 378 Hüküm no: 573 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aci Todori vereselerinin alacak davasıyla İstefan’ın varisi David’e açtıkları davayı ispat edemedikleri Men‘ Ma‘rûz Medîne-i Konya nevâhîsinden Sordan(?) nâhiyesine tâbi‘ Şible karyesinde mütemekkin iken bundan akdem hâlik olan Aci Todori v. Mihal v. Anaştaş zimmînin verâseti zevce-i metrûkesi Evsiye bt. Aci Toma Nasrâniye ile sulbî kebîr oğlu Yordam zimmîye ve sulbiye kebîre kızları Elisavit ve Aci Eksendiye ve Despina ve Epenzerye(?) ve Hristiyani ve Kadinko Nasrâniyelere münhasıra olduğu lede’ş-şer‘i’l-enver zâhir ve mütehakkık oldukdan sonra verese-i mersûme taraflarından husûs-ı âti’l-beyânda bâ-hüccet vekîl olduğu şahs-ı mersûmânı bilir Yorgi v. Hristo ve Aci Kozma v. Anaştaş zimmîler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan Hrisani v. Aleksi nâm zimmî İstanbul Bâb Mahkemesi’nde meclis-i şer‘-i hatîrde şerbetçi tâifesinden bundan akdem hâlik olan İstefan v. Atam zimmînin verese-i münhasırasından sulbî kebîr oğlu David zimmî muvâcehesinde müvekkillerim mersûmûnun babaları ve mûrisleri hâlik-i mersûm Aci Todori zimmînin hâlik-i mersûm İstefan zimmî zimmetinde cihet-i karzdan bâ-temessük bin guruş alacak hakkım olup meblağ-ı mezkûru mesfûr İstefan zimmîden kable’l-ahz ve’l-[istîfâ] İstefan hâlik ve meblağ-ı mezkûr müvekkillerim mersûmûna mevrûs olmağla meblağ-ı mezkûr bin guruşu hâlik-i mersûm İstefan zimmînin terekesinden müvekkillerim mersûmûn için bana edâya mersûm David zimmîye tenbîh olunmak bi’l-vekâle matlûbumdur deyü da‘vâ ettikde ol dahi cevâbında külliyen inkâr etmekle müdde‘î-i vekîl-i mersûm Hrisani zimmî ber-vech-i muharrer müdde‘âsına ikāmet-i beyyine edemeyip bi’t-taleb mesfûr David zimmîye bi’l-muvâcehe vech-i şer‘î üzere adem-i ilme yemîn verilmeğin mûcebince müdde‘î-i vekîl-i mersûm Hrisani zimmî da‘vâ-yı mezkûresiyle mersûm David zimmîye bilâ-beyyine mu‘ârazadan men‘ olunduğu mübâşirleri Bâb-ı Seraskerî kavaslarından Mazlum Kavas kulları yediyle huzûr-ı [âlîlerine i‘lâm olundu] Fî 8 Rebî‘ülevvel sene [1]256