Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 380 Hüküm no: 575 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çizmeci Ali’nin çeşitli eşya bedellerinden hanımı Esma Hatun’a olan borcunu ödemesi 270 guruş hüküm Ma‘rûz İstanbul’da Langa kurbünde Bostanî Abdullahağa mahallesinde sâkine sâhibe-i arzuhâl mu‘arrefetü’z-zât Esma bt. Abdullah nâm hatun İstanbul Bâb Mahkemesi’nde meclis-i şer‘-i münîrde hâlâ zevci derûn-ı arzuhâlde mezkûrü’l-ism Çizmeci Ali b. Mehmed nâm kimesne muvâcehesinde ben târîh-i i‘lâmdan sekiz ay mukaddem mâlımdan zevcim mezbûr Ali’ye mecmû‘u dört yüz on dört guruş kıymetli bir anteri ma‘a şalvar ve yün memlû bir döşek ve iki aded minderimi teslîm ve âhara bey‘ birle esmânını kabz ve bana teslîme tarafımdan zevcim mezbûru tevkîl eylediğimde ol dahi eşyâ-i mezkûreyi ba‘de’l-ahz ol mikdâr guruşa âhara bey‘ birle semenini kabz ve bi-gayri hakkın kendi umûruna sarfla istihlâk etmekle meblağ-ı mezkûr dört yüz on dört guruşu zevcim mezbûr Ali’den bi-tarîkı’d-damân taleb ederim deyü da‘vâ ettikde ol dahi cevâbında zikr olunan anteri ve şalvarı yüz otuz guruşa ve döşeği yirmi guruşa ve iki aded minderi yüz guruşa ki cem‘an iki yüz yetmiş guruşa vech-i meşrûh üzere âhara bey‘le istihlâk eylediğini ve meblağ-ı mezkûr iki yüz yetmiş guruş zimmetinde deyni olduğunu ikrâr ziyâde yüz kırk dört guruş müdde‘âsını inkâr etmekle müdde‘iyye-i mezbûre Esma Hatun ber-vech-i muharrer <> ziyâde yüz kırk dört guruş müdde‘âsına ikāmet-i beyyine edemeyip talebiyle zevci merkūm Ali’ye vech-i şer‘î üzere yemîn verilmeğin mûcebince müdde‘iyye-i merkūme Esma Hatun’a ber-vech-i meşrûh ziyâde yüz kırk dört guruş müdde‘âsıyla zevci mezbûr Ali’ye bilâ-beyyine mu‘ârazadan ba‘de’l-men‘ merkūm Ali’nin sâlifü’z-zikr ikrâr u i‘tirâfıyla lâzım gelen meblağ-ı mezkûr iki yüz yetmiş guruşu zevcesi müdde‘iyye-i mezbûre Esma Hatun’a edâ ve teslîme mezbûr Ali’ye tenbîh olunduğu huzûr-ı [âlîlerine i‘lâm olundu] Fî 4 Rebî‘ülevvel sene 1256