Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 380 Hüküm no: 576 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hanife Hatun’un talebiyle yanında bulunan çocuğu Şerife Kâmile’ye babası Hasan Ağa’nın ödemesi şartıyla nafaka takdir edildiği Nafaka Ma‘rûz İstanbul’da Davudpaşa İskelesi kurbünde Bayezid-i Cedîd mahallesinde sâkine sâhibe-i arzuhâl mu‘arrefetü’z-zât Şerife Hanife bt. el-Hâc Halil nâm hatun İstanbul Bâb Mahkemesi’nde meclis-i şer‘-i hatîrde zevc-i sâbıkı derûn-ı arzuhâlde ismi mezkûr es-Seyyid Hasan Ağa b. Sadullah nâm kimesne muvâcehesinde hâmiş-i arzuhâlde mastûr Davudpaşa Mahkemesi sicillâtından muhrec bir kıt‘a hüccet kaydı nâtıka olduğu üzere mezbûr es-Seyyid Hasan zevc-i dâhilim olup lâkin beynimizde hüsn-i mu‘âşeretimiz olmadığı ecilden mezbûrun zimmetinde mehr-i müsemmâm olan yüz guruş ile nafaka-i iddetim ve mezbûrun firâşından hâsıla ve benden mütevellide işbu hâzıratü bi’l-meclis Şerife Kâmile nâm sagīre dokuz yaşını tekmîl edinceye değin kendi mâlımdan infâk ve iksâ edip eğer kable tamâmi’l-müddet fevt olur ise nafaka-i bakiyesinden zimmetim berîe olmak üzere zevcim mezbûr ile muhâla‘a-i sahîha-i şer‘iyye ile hul‘ <> olmuşidim lâkin ben fakīre ve mu‘dime ve mu‘sire olmamla sagīre-i mezbûrenin nafakasi’çün mûsir olan babası merkūm es-Seyyid Hasan Ağa üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde ol dahi ba‘de’t-tasdîk sagīre-i mezbûrenin nafakasi’çün babası mezbûr es-Seyyid Hasan Ağa üzerine işbu târîh-i i‘lâmdan i‘tibâren beher şehr otuzar guruş kıbel-i şer‘den farz ve takdîr olunup meblağ-ı mefrûz-ı mezkûru sagīre-i mezbûrenin nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr es-Seyyid Hasan Ağa üzerine rücû‘a vâlidesi ve hâzınesi mezbûre Şerife Hatun’a izin verildiği huzûr-ı [âlîlerine i‘lâm olundu] Fî 4 Rebî‘ülevvel sene 1256