Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 381 Hüküm no: 577 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un faiz alacağı olduğu iddiasıyla Mehmed Ağa’ya açtığı davanın reddedildiği Bilâ-devr murâbaha men‘i Ma‘rûz Bundan akdem vefât eden Hadice Hatun bt. Mustafa b. Abdullah’ın sulbiye kebîre kızı ve hasran vârisi idiği lede’ş-şer‘i’l-enver bi’l-ihbâr zâhir ve mütehakkık olan sâbibe-i arzuhâl mu‘arrefetü’z-zât Zeyneb bt. Osman nâm hatun İstanbul Bâb Mahkemesi’nde meclis-i şer‘-i münîrde derûn-ı arzuhâlde ismi mezkûr Mehmed Ağa b. el-Hâc Rüstem nâm kimesne muvâcehesinde vâlidem ve mûrisem müteveffât-ı mezbûrenin merkūm Mehmed Ağa zimmetinde ma‘lûmü’l-mikdâr akçe murâbahasından bilâ-devr-i şer‘î iki yüz elli guruş alacağı olup vâlidem müteveffât-ı merkūme hayatında meblağ-ı mezkûru merkūm Mehmed Ağa[dan] kable’l-ahz ve’l-istîfâ fevt ve meblağ-ı mezkûr bana mevrûs olmağla meblağ-ı mezkûr iki yüz elli guruşu merkūm Mehmed Ağa’dan bi’l-verâse hâlâ taleb ederim deyü takrîr-i meşrûhu üzere tasaddî eylediği bilâ-devr murâbaha da‘vâsı meşrû‘a ve iltifâta şâyân olmadığı tescîl ve huzûr-ı [âlîlerine i‘lâm olundu] Fî 8 Rebî‘ülevvel sene 1256