Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 382 Hüküm no: 578 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa’nın Kasap Süleyman ile ortağı Emin’e olan borcunu ödemesi 450 guruş hüküm Ma‘rûz Bâ‘isü’l-i‘lâm Kasab Süleyman b. Ali ve şerîki el-Hâc Emin b. İbrahim nâm kimesneler İstanbul Bâb Mahkemesi’nde meclis-i şer‘de Halil Ağa b. Mehmed nâm kimesne muvâcehesinde merkūm Halil Ağa zimmetinde bundan akdem mâl-ı müşterekimizden iştirâ ve kabz eylediği ma‘lûmü’l-vezn ve’l-fiyat lahm-ı ganem semeninden ba‘de külli’l-hesâb gayr-ı ez-teslîmât sahhu’l-bâkī bâ-temessük dört yüz elli guruş alacak hakkımız olmağla meblağ-ı bâkī-i mezkûru merkūm Halil Ağa’dan hâlâ taleb ederiz deyü da‘vâ ettiklerinde ol dahi cevâbında kaziyye minvâl-i meşrûh üzere meblağ-ı bâkī-i mezkûr dört yüz elli guruş zimmetinde deyni olduğunu ikrâr ü i‘tirâf etmeğin alâ-mûcibi i‘tirâfihî meblağ-ı bâkī-i mezkûr dört yüz elli guruşun şerîkân-ı merkūmân Süleyman ve el-Hâc Emin’e edâ ve teslîmiyle merkūm Halil Ağa ilzâm olunduğu huzûr-ı [âlîlerine i‘lâm olundu] Fî 27 S sene 1256