.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 133
Hüküm no: 123
Orijinal metin no: [25a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Geldiklan nâhiyesi Karık köyü mâlikânesi hissesi ile Çat Zaviyesi zâviyedarlığı hissesine mutasarrıf olan Seyyid Mehmed Ârif ve Seyyid İbrahim’in kaybettikleri beratlarının yenilenmesi

Sâdır olan fermân-ı âlîlerine imtisâlen işbu arzuhâle ve derkenâra nazar olundukda medîne-i Amasya kazâsına muzâfe Geldiklan nâhiyesinde Karık nâm-ı diğer Hotini karyesinin mâlikânesiyle Çat Zâviyesi’nin dört sehmden üç sehm evlâd-ı zükûruna şart ve ta‘yîn ve bir sehm dahi kazâ-i mezbûra tâbi‘ Çat Zâviyesi’nin zâviyedârlığına şart olup ber-mûceb-i şart-ı vâkıf Küçük Arslan evlâdlarından es-Seyyid Mehmed Ârif ve es-Seyyid İbrahim nâm karındaşlar evlâdiyet ve meşrûtiyet üzere bâ-berât-ı âlîşân mutasarrıflar olup yedlerinde olan berat-ı şerîfi bi-kazâillâhi te‘âlâ zâyi‘ olduğundan bahisle sahib-i arzuhâl mezbûrdan es-Seyyid Mehmed Ârif [ve] es-Seyyid İbrahim zâyi‘inden kendi hisselerine müceddeden bir kıt‘a berat-ı şerîf-i âlîşân i‘tâ olunmasını işbu arzuhâl ile istid‘â ederler, fi’l-hakīka karye-i mezbûre mâlikânesinin dört sehmden dört sehmine sahib-i arzuhâl mezbûrân es-Seyyid mehmed Ârif ve es-Seyyid İbrahim’in müstakillen sehm i‘tibârıyla dört sehmi yine sahib-i arzuhâl mezbûrân es-Seyyid Mehmed Ârif ve es-Seyyid İbrahim ibney Mehmed İzzet ve bâkī iki sehm dahi derûn-ı derkenârda mezkûrü’l-ism Seyyid Mustafa ve es-Seyyid Ahmed ibney Seyyid Mehmed nâm karındaşların ber-mûceb-i kuyûd üzerlerinde başka başka beratıyla olduğu askerî rûznâmçesi derkenârından müstebân ve merkūmân es-Seyyid Mehmed Ârif ve es-Seyyid İbrahim nâm karındaşların mâlikâne-i mezkûrede ber-vech-i iştirâk sahib-i hisse olduklarını kazâ-i mezbûr ahâlîsinden Der-aliyye’de müsâfiren sâkinler Mehmed b. Ebûbekir ve Hüseyin b. Mustafa nâm mevsûku’l-kelim kimesnelerin ihbârlarıyla sahib-i berat idiklerini zâhir ve nümâyân olmağın bu sûretde ber-mûceb-i kuyûd sahib-i arzuhâl es-Seyyid Mehmed Ârif ve es-Seyyid İbrahim ibney es-Seyyid Mehmed İzzet nâm karındaşlara iştirâk[en] zâyi‘den bir kıt‘a berat-ı şerîf-i âlîşân inâyet ve ihsân buyurulmak iktizâ eylediği huzûr-ı âlîlerine i‘lâm olundu.

Fî R sene [12]49