Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 384 Hüküm no: 582 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un satın aldığı zenci cariyenin kusurlu olduğundan cariyeyi geri alıp parasının iade edilmesi talebiyle Mehmed Hüsnü Efendi’ye açtığı davayı ispat edemediği Câriye men‘i Ma‘rûz Mahrûse-i Galata’ya muzâfe kasaba-i Tophâne’de İlyasçelebi mahallesinde sâkine sâhibe-i arzuhâl mu‘arrefetü’z-zât Hanife bt. İbrahim nâm hatun İstanbul Bâb Mahkemesi’nde meclis-i şer‘-i münîrde Dîvân-ı hümâyûn Kalemi ketebesinden derûn-ı arzuhâlde <> ismi mezkûr Mehmed Hüsnü Efendi b. Musa nâm kimesne muvâcehesinde ben târîh-i i‘lâmdan sekiz ay mukaddem mezbûr Mehmed Hüsnü Efendi’den cemî‘ uyûbdan sâlime olmak üzere bin yüz elli guruş semen-i medfû‘ ve makbûza iştirâ ve kabz eylediğim işbu hâzıratü bi’l-meclis bir re’s zenciye câriyenin rîh-i tayyâr illeti olup ol vechile mu‘ayyebe ve ayb-ı mezkûr şirâ târîhinden kadîm ve inde’t-tüccâr noksân-ı semen îcâb eder uyûbdan olmağla câriye-i merkūmeyi geri ahz birle makbûzu olan semen-i mezkûr bin yüz elli guruşu bana teslîme mezbûr Mehmed Hüsnü Efendi’ye tenbîh olunmak matlûbumdur deyü teveccüh-i husûmet bulundukdan sonra da‘vâ ettikde ol dahi cevâbında câriye-i hâzıra-i mezbûreyi târîh-i mezkûrda minvâl-i muharrer [üzere] cemî‘ uyûbdan sâlime olduğu hâlde ol mikdâr guruş semen-i makbûza müdde‘iyye-i mezbûre Hanife Hatun’a bey‘ini ikrâr ve illet-i mezkûrenin kıdemini inkâr etmekle müdde‘iyye-i mezbûre ber-minvâl-i meşrûh müdde‘âsına ikāmet-i beyyine edemeyip talebiyle mezbûr Mehmed Hüsnü Efendi bi’l-muvâcehe vech-i şer‘î üzere tahlîf olunmağın mûcebince müdde‘iyye-i merkūme da‘vâ-yı mezkûresiyle merkūm Mehmed Hüsnü Efendi’ye bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu] Fî-selhi Saferi’l-hayr sene 1256