Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 385 Hüküm no: 583 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azdavaylı Abdülbaki oğlu Mustafa’nın alacak talebiyle Gözlemeci İbrahim’e açtığı davanın reddedildiği Men‘ Ma‘rûz Anadolu’da Kastamonu sancağında Azdavay kazâsı ahâlîsinden Abdülbaki oğlu Mustafa b. İbrahim nâm kimesne İstanbul Bâb Mahkemesi’nde meclis-i şer‘-i münîrde kazâ-i mezbûr ahâlîsinden Gözlemeci İbrahim b. Mustafa nâm kimesne muvâcehesinde târîh-i i‘lâmdan on sene mukaddem kazâ-i mezbûr nâibi olan gāib ani’l-beled Abdullah Efendi’yi azlettirmek için kazâ-i merkūm vücûhları ve sâirleri beni taraflarından tevkîl eylediklerinde Âsitâne-i seniyye’de husûs-ı mezkûr zımnında merkūm İbrahim benimle ma‘an sa‘y edip ve ol târîhde Kırkçeşmeli Hasan Efendi kapıkethüdâsı olmak takrîbiyle nâib-i gāib-i merkūm Abdullah Efendi’nin mukaddemâ mâhiyyesinden terâküm eden beş yüz guruşu benden almadıkça azletmemekle mezbûr İbrahim beni teşvîk ve iğfâl birle meblağ-ı mezkûr beş yüz guruşun dört yüz guruşunu müvekkillerim mezbûrûndan Tekyenişînoğlu diğer İbrahim’in mâlından ve yüz guruşunu kendi mâlımdan olarak cem‘an beş yüz guruşu rızâmla merkūm Hasan Efendi’ye def‘ u teslîm etmişidim lâkin ben mâlımdan te’diye eylediğim yüz guruşu nâib-i gāib-i mezbûr bana vermeyip husûs-ı mezkûr için meblağ-ı mezbûr yüz guruşu vermeme merkūm İbrahim’in teşvîki sebeb olmağla öyle olacak meblağ-ı merkūmu bana mâlından vermek üzere mezbûr İbrahim’e cebr olunsun deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i merkūm Mustafa’ya tefhîm ve da‘vâ-yı mezkûresiyle mezbûr İbrahim’e bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 4 Şevvâl sene [1]255