Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 385 Hüküm no: 584 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medineli Müftüzade Muhammed el-Hâdî Efendi’nin Şerife Fâtıma Hatun’a olan borcunu ödemesi 90,5 guruş hüküm Ma‘rûz İstanbul’da Şeyh Ebulvefâ kurbünde Dârülhadîs mahallesi ahâlîsinden olup bin iki yüz kırk dokuz senesi hilâlinde hacc-ı şerîfden gelir iken esnâ-i râhda vefât eden Haffâf el-Hâc Veliyyüddin b. el-merhûm Ferâizî Yusuf Efendi b. Abdullah’ın vâlidesi ve hasran vârisesi idiği bi’l-ihbâr zâhir olan sâhibe-i arzuhâl mu‘arrefetü’z-zât Şerife Fâtıma bt. Mehmed Mesud nâm hatun İstanbul Bâb Mahkemesi’nde meclis-i şer‘-i münîrde Medîne-i Münevvere ahâlîsinden derûn-ı arzuhâlde mezkûrü’l-ism Müftîzâde Muhammed el-Hâdî Efendi b. Muhammed b. el-Abidin tarafından husûs-ı âti’l-beyânda vekîl olduğu Anadolu kuzâtından es-Seyyid Osman Efendi b. Ali ve Ahmed Ağa b. Mehmed şehâdetleriyle ber-nehc-i şer‘î sâbit olan el-Hâc Mehmed Emin b. el-Hâc Mustafa nâm kimesne muvâcehesinde mûrisim oğlum müteveffâ-yı mezbûr el-Hâc Veliyyüddin’in müvekkil-i mûmâ-ileyh Muhammed el-Hâdî Efendi zimmetinde hayatında mâlından ve yedinden iştirâ ve kabz eylediği aded ve fiâtı beynlerinde ma‘lûm haffâf emti‘ası esmânından üç yüz guruş alacak hakkı olmağla meblağ-ı mezkûru kable’l-ahz ve’l-istîfâ fevt ve meblağ-ı mezkûr ancak bana mevrûs olmağın meblağ-ı mezkûru müvekkil-i mûmâ-ileyhe izâfetle vekîl-i merkūmdan bi’l-verâse hâlâ taleb ederim deyü ba‘de’d-da‘vâ ve’s-suâl vekîl-i mezbûr dahi cevâbında müvekkilim mûmâ-ileyhin müdde‘iyye-i mezbûrenin mûrisi müteveffâ-yı mezbûra hayatında cihet-i merkūmeden ancak doksan buçuk guruş deyni olduğunu bi’l-vekâle ikrâr ziyâde iki yüz dokuz buçuk guruş müdde‘âsını ba‘de’l-inkâr müdde‘iyye-i mezbûre Şerife Fâtıma Hatun ber-minvâl-i muharrer ziyâde müdde‘âsına ikāmet-i beyyineden ızhâr-ı acz ile müvekkil-i mûmâ-ileyhi istihlâf ettikde kıbel-i şer‘den bi’l-iltimâs me’zûnen mürsel Kâtib Mehmed Selim Efendi’nin müvekkil-i mûmâ-ileyhin sâkin olduğu İstanbul’da Şeyh Ebulvefâ kurbünde Mollahüsrev mahallesinde kâin menzilinde huzûr-ı Müslimînde akdeylediği meclis-i şer‘de müdde‘iyye-i mezbûre muvâcehesinde müvekkil-i merkūm Mehmed el-Hâdî Efendi’ye ziyâde iki yüz dokuz buçuk guruş husûsunda vech-i şer‘î üzere yemîn verdiğini ma‘an meb‘ûs ümenâ-i şer‘le meclis-i şer‘a gelip inhâ ve takrîr etmeğin mûcebince müdde‘iyye-i mezbûre Şerife Fâtıma Hatun ber-vech-i muharrer ziyâde iki yüz dokuz buçuk guruş müdde‘âsıyla müvekkil-i mezbûr Mehmed el-Hâdî Efendi’ye bilâ-beyyine mu‘ârazadan ba‘de’l-men‘ vekîl-i mezbûr el-Hâc Mehmed Emin’in sâlifü’l-beyân ikrâr u i‘tirâfıyla lâzım gelen meblağ-ı mezkûr doksan buçuk guruşu müdde‘iyye-i mezbûre Şerife Fâtıma Hatun’a edâ ve teslîmiyle müvekkil-i mûmâ-ileyhe izâfetle vekîl-i mezbûr el-Hâc Mehmed Emin ilzâm olunduğu huzûr-ı [âlîlerine i‘lâm olundu] Fî 20 S <> sene 1256