Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 387 Hüküm no: 587 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un talebiyle boşandığı kocası Hüseyin’in ödemesi şartıyla küçük çocukları Mehmed Arif’e nafaka takdir edildiği Mahmiye-i İstanbul’da Edirnekapısı kurbünde el-Hâc Muhyiddin mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Emine bt. Mehmed nâm hatun meclis-i şer‘-i şerîf-i enverde zevc-i sâbıkı Hüseyin b. İbrahim nâm kimesne mahzarında takrîr-i kelâm ve ta‘bîr ani’l-merâm edip mezbûr Hüseyin ile mukaddemâ zevciyyet beynimizde kāime iken mezbûrun firâşından hâsıl ve benden mütevellid ve bi-hakkı’l-hıdâne hâlâ hacr u terbiyemde olan sekiz aylık Mehmed Ârif nâm sagīrin aslâ mâlı olmayıp nafaka ve kisveye eşedd-i ihtiyâc ile muhtâc <> olmağla sagīr-i mezbûrun nafakasi’çün babası mezbûr üzerine kıbel-i şer‘den kadr-ı ma‘rûf meblağ farz ü takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i mevki‘-i sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafakasi’çün babası mezbûr üzerine işbu târîh-i kitâbdan beher şehr ellişer guruş farz ü takdîr buyurup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr üzerine rücû‘a vâlidesi ve hâdinesi mezbûre Emine Hatun’a izin vermeğin mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-şehri Rebî‘ilevvel li-sene sitte ve hamsîn ve mi’eteyn ve elf. Şuhûdü’l-hâl: Muhzır İsmail Ağa, Muhzır Ömer Ağa, Muhzır Ali Ağa