Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 84 Hüküm no: 83 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ano bt. Hüdaverdi’nin hizmetini gördüğü Fatilo v. Yamandi’den alacaklarını tahsil ettiği Fi’l-asl Ulah’da vâki‘ Manastır karyesi ahâlîsinden olup medîne-i Üsküdar’a muzâfe Adalar nâhiyesine tâbi‘ Ada-i kebîr karyesinde mütemekkine olup Ano bt. Hüdaverdi nâm Nasrâniye zâtı ba‘de’l-mu‘arrefe meclis-i şer‘-i hatîrde işbu râfi‘ü’r-rakīm Fatilo v. Yamandi zimmî muvâcehesinde bi-tav‘ihâ ikrâr ve takrîr-i kelâm edüp merkūm Fatilo zimmî târîh-i kitâbdan iki sene üç ay mukaddem evlâd-ı sıgārından Panayola ve İrini’yi rü’yet ve menzili derûnunda hizmetinde beni senevî yirmi beş guruş ile ve bir Frenk şâlîsi cebe ve bir mâvi alacalı anteri ve bir yunmamış anteri ve bir değirmi baş yemenîsi üzerine istihdâm etmekle ben dahi ücret ile hizmet eder makūlesinden olduğum ecilden evlâd-ı sıgārını rü’yet ve menzil derûnunda iki sene üç ay hizmetim sebkat edüp zimmetinde müctemi‘ olan yetmiş bir guruş hakkımı mesfûr Fatilo zimmî bana tamâmen def‘ u teslîm eylediğinde ben dahi meblağ-ı mezkûr yetmiş bir guruşu yedinden ahz ü kabz eyledim mârrü’z-zikr ücretimden mesfûr Fatilo zimmî yedinde ve zimmetinde bir akçe ve bir habbe bâkī kalmayup fîmâ-ba‘d husûs-ı ücret-i mezkûra müte‘allıka âmme-i da‘vâdan zimmetini ibrâ ve iskāt eylediğimde ol dahi ibrâyı kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-şehri Rebî‘i’l-âhir li-sene semânîn ve mi’ete ve elf. Şuhûdü’l-hâl: Es-Seyyid Ahmed Ağa, Ahmed Efendi, Hamamcı Halil Beşe, es-Seyyid Mustafa, es-Seyyid Uzun Mustafa. Yamandi v. Panayot, Manolaki v. Dimitraki, Mitro v. Hürmüz, Andon v. Estorinos, Hürmüz v. Eksori, Yuvan v. Kumru, Avanis v. Kumru, Papa Yakim v. Papa Andon, Avanis v. Ohan.