Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 85 Hüküm no: 84 Orijinal metin no: [17b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gaylat v. Polihorn ile karısının müştereken sahibi oldukları evi Kostandi’ye sattıkları Medîne-i Üsküdar’a muzâfe Adalar nâhiyesine tâbi‘ Pendik karyesinde mütemekkin Gaylat? v. Polihron zimmî ve zevcesi olup şahsı vech-i şer‘î üzere mu‘arrefe olan Hrosni bt. Moskona Nasrâniye meclis-i şer‘-i hatîrde işbu râfi‘ü’r-rakīm Kostandi v. Aci Fanilo zimmî muvâcehesinde her biri ikrâr ve takrîr-i kelâm edüp akd-i âti’z-zikrin sudûruna değin yedimizde ale’l-iştirâki’s-seviy mülkümüz olup karye-i mezkûrede vâki‘ bir tarafı Tarandafil menzili ve bir tarafı Aci Mihail menzili ve bir tarafı Sağır Palaş zimmî menzili ve bir tarafı tarîk-i âm ile mahdûd fevkānî iki bâb oda ve bir cedîd sofa ve bir kenîf [ve bir] oda ve tahtında ahır ve kenîf ve sokak kapısını müştemil mülk menzilimizi bi-cümleti’t-tevâbi‘ ve’l-levâhık ve kâffeti’l-hukūk tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūma üç yüz kırk guruşa bey‘ u teslîm ve temlîk eylediğimizde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr üç yüz kırk guruşu müşterî-i merkūm yedinden bi’t-tamâm ve’l-kemâl ahz ü kabz eyleyüp menzil-i mezkûrun gabn ü tağrîrine müte‘allıka âmme-i da‘vâdan müşterî-i merkūmun zimmetini ibrâ-i âm ile ibrâ ve iskāt eyledik fîmâ-ba‘d menzil-i mahdûd-ı mezkûrda bizim kat‘â ve kātıbeten alâka ve medhalimiz kalmayup müşterî-i merkūmun mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’r-râbi‘ aşer min-Cemâziyelâhir li-seneti semânîn ve mi’ete ve elf. Şuhûdü’l-hâl: [18a] Nalband Halil Beşe, el-Hâc Ahmed oğlu Mehmed Beşe, Kalyoncu Mehmed Beşe, Ahmed Efendi, Osman Ağa, Ziver Efendi. Lazferi? v. Kosta, Aci Londeri v. Vasilikos, Keresteci Paskal v. Soli, Berber Estorinos v. Hıristodoli, Andonaki v. İlya, Yamandi v. Togodoş, Moralı Todori v. Yorgi zimmî.