.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 133
Hüküm no: 124
Orijinal metin no: [25a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Seyyid Mehmed Hilmi Efendi’nin, vefat eden hanımına ait terekeyi gasb edenlerden geri almak istemesi

Sahib-i arzuhâl es-Seyyid Mehmed Hilmi Efendi’nin zevce-i menkûhası olan Hanım otuz bir senesinde hâlike olduğu emlâk ve eşyâsından bir mikdârını bâ-hüccet-i şer‘iye zevci mezbûr es-Seyyid Mehmed Hilmi Efendi’ye bey‘ ve teslîm ve kabz-ı semen edip bir müddetden sonra zevce-i menkûhası bi-emrillâhi te‘âlâ fevt oldukda verâseti zevci mezbûr es-Seyyid Mehmed Hilmi Efendiyle kız karındaşına münhasıra iken mezbûr es-Seyyid Mehmed Hilmi Efendi ol esnâda li-ecli’s-sıla Ermenek kazâsında bulunmağla müteveffiye-i mezbûrenin menzil derûnunda bulunan cümle eşyâ ve sâir emlâklerini kazâ-i mezbûr ahâlîlerinden Mehmed Ağa ve Reşid Ağa bizlere müteveffiye-i mezbûre hîbe ve teslîm eyledi diyerek fuzûlî zabteyleyip ve bâkī kalan emlâk ve eşyâdan dahi kazâ-i mezbûr voyvodası bulunan Ömer Necib Ağa’ya istinâden kazâ-i mezbûr ahâlîsinden Hacı Receboğlu Yahya nâm kimesne fuzûlî ahz ettiklerinden sahib-i arzuhâl es-Seyyid Mehmed Hilmi Efendi sıla-i rahminden gelip zevce-i menkûhasının terekesine vâzı‘u’l-yed olanlar mezbûrân Mehmed Ağa ve Reşid Ağa ve mezbûr Receboğlu fevt olup vereselerinden taleb ve da‘vâya tesâddî etmiş ise de birbirine istinâden ihkāk-ı hak olunmak mümkün olmadığından Karaman vâlîsi atûfetlü paşa hazretlerinin huzûrunda terâfu‘-i şer‘-i şerîf olunmak bâbında bir kıt‘a emr-i âlî niyâzında olduğu meâl-i arzuhâlden müstefâd olduğu bu sûretde vâzı‘u’l-yed olanlardan zevce-i metrûkesinin emlâk ve eşyâ-i sâiresini ma‘rifet-i şer‘le taleb ve da‘vâ olunmak bâbında Konya hâkimi efendi dâ‘îlerine hitâben bâlâsı tuğrâ-yı garrâ ile mu‘anven bir kıt‘a emr-i âlîşân sudûru iktizâ eylediği imtisâlen li’l-emri’l-âlî huzûr-ı âlîlerine i‘lâm.

Fî 5 R sene [12]49