.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 134
Hüküm no: 125
Orijinal metin no: [25b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Tokat Arminos köyü mescidinin camiye çevrilerek hitabet görevine İbrahim b. Ebûbekir’in tayin edilmesi

Sâdır olan fermân-ı âlîlerine imtisâlen işbu arzuhâl ve derkenâra nazar olundukda medîne-i Tokat kurâlarından Arminos nâm karyede vâki‘ mescid-i şerîfin bilâ-berât imâmı olan sahib-i arzuhâl es-Seyyid Ahmed ve Ömer nâm kimesne mescid-i mezkûrda evkāt-ı hamsede salât-ı mefrûzayı edâ edip bir tarafdan dahl olunmak îcâb etmez iken karye-i mezkûre sükkânından İbrahim nâm kimesne zuhûra gelip ecdâdlarımızın binâ ve ihyâ eylediği mescid-i mezbûra minber vaz‘ edip ba‘dehû bir-takrîb hitâbetin üzerine berat ettirip sahib-i arzuhâllere gadr-i küllî olduğundan bahisle muhdes olan hitâbet-i mezkûrun berat kaydı kaleminden terkīn olunmasını işbu arzuhâlle istid‘â ederler ise de fi’l-hakīka mescid-i mezkûrun cemâ‘ati kesîr olduğundan ahâlî-i karye mescid-i mezkûra müceddeden minber vaz‘ edip câmi‘-i şerîf olmağla bir hatîb nasb u ta‘yîn olunmak lâzım olduğundan ber-vech-i hasbî hatîb olan İbrahim b. Ebûbekir’e 49 senesi Saferü’l-hayrı târihinde kazâ-i mezbûr nâibi es-Seyyid İbrahim Zühdü Efendi’nin i‘lâmıyla tevcîh olunup üzerinde olduğu ve derkenârdan müstebân için tevcîh-i pâdişâhîsi sebkat edip bilâ-mûcib ref‘ ve terettübü hilâf-ı şer‘-i şerîf olmağla sahib-i arzuhâller istintâk olundukda mescid-i mezbûr ancak bizim mülk-i sarîhimiz olup asla mescid yokdur, hilâf-ı inhâ ile bizim ecdaddan? mülk olan mahalli câmi‘-i şerîfe binâ ile mülkümüz olan yerleri dâ‘iyesinde olduğu sahib-i arzuhâl şifâ[h]en …? etmiş ise de husûs-ı mezkûr fi’l-hakīka mülk müdür, yoksa mescid-i şerîf midir, bu tarafda tahkīk olu[nan] mevâddan mahâllinden isti‘lâma muhtâc olduğu huzûr-ı âlîlerine i‘lâm olundu.

Fî 17 R sene [12]49