|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 135 Hüküm no: 126 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Banaz kazası Kocakır köyündeki Kocakara Zaviyesi zâviyedarı Süleyman b. Musa’nın vefatıyla yerine oğlu Ali’nin tayini
Sâdır olan fermân-ı âlîlerine imtisâlen medîne-i Uşak nâibi es-Seyyid İbrahim Edhem Efendi dâ‘îlerinin mühr-i mutâbıkı i‘lâmıyla derkenâra nazar olundukda Banaz kazâsında Kocakır karyesinde vâki‘ Kocakara Zâviyesi’nin âyende vü revendeye it‘âm-ı ta‘âm etmek şartıyla evlâdiyet ve meşrûtiyet üzere bâ-berât-ı şerîf-i âlîşân zâviyedârlığına mutasarrıf olan Süleyman b. Musa fevt olup yeri hâlî kalmağla müteveffâ-yı merkūmun mahlûlünden sulbî oğlu Ali’ye tevcîh olunması nâib-i mûmâ-ileyhin arz-ı mezkûr meâlinden müstefâd olup zâviyedârlık-ı mezkûrun sahib-i ehl-i sünnet ve’l-cemâ‘at olduğu mukaddemâ mûcebiyle mahâllinde ma‘rifet-i şer‘le tahkīk ederek zâviyedârîne terk olunmuş olmağla zâviyedârlık-ı mezkûr Monlâ Bektâşî zevâyâsından olarak Mukāta‘at Hazînesi’nden zabt mukāta‘at nâzırı atûfetlü es-Seyyid Abdurrahman Nafiz Efendi bendelerinin i‘lâmından müstebân ve merkūm Süleyman’ın fevti vâki‘ ve mezbûr Ali müteveffâ-yı merkūmun sulbî sahîh oğlu olduğu kazâ-i mezbûr ahâlîsinden Der-aliyye’de müsâfiren sâkinler Hacı Mehmed b. Mehmed ve Ahmed b. İbrahim nâm kimesnelerin alâ-tarîkı’ş-şehâde haber vermeleriyle zâviyedârlık-ı mezkûr evlâdiyet ve meşrûtiyet üzere müteveffâ-yı merkūmun mahlûlünden sulbî oğlu Ali b. Süleyman Halîfe’ye tevcîh ve yedine berat-ı şerîf-i âlîşân i‘tâ buyurulmak iktizâ eylediği huzûr-ı âlîlerine arz u i‘lâm olundu.
Fî 25 R sene [12]49
|